Табасаран эскрар – Ватандин Аьхю дявдин иштиракчйир

Малляли Нурмягьямедов

1916-пи йисан Табасаран райондин Хархни гъулаъ бабкан гъахьну.

 

Сталинград уьбхьбан женгнан иштиракчи Нурмягьямедовди йигъну немцари кьялаъ тIапIнайи шагьриз итIру сурсатар хури ва зийнар духьнайи эскрар шагьриан адагъури, хъа йишвну немцари ккивнайи минйир ккадагъуз гъягъюри гъахьну. Дявдин кьяляхъ СтIал Сулеймандин ччвурнахъ вуйи колхоздиъ бригадирди ва председателди гъилихну. Ватандин Аьхю дявдиъ иштирак хьпаз ва душваъ кIубанвал улупбаз лигну, думу II ва III дережайин Машгьурвалин орденариинди, «Сталинград уьбхбаз лигну» ва хъана хайлин жара медалариинди лишанлу дапIна.