Зубайдат Шябанова
Гьаму йигъари Табасаран райондиъ аьхю мархьар ургъбан ва жил кучвубхну гъюбан дюшюшариъ зарар гъабхьи хизанариз кюмек тувну.

Табасаран райондин глава Мягьямед Къурбановди 3-пи июнди Ругуж, Кувагъ, Дарвагъ, ТIюрягъ, Хили-Пенжигь, Хьарагъ, ХустIил, Гюгьрягъ ва гьацира жара гъулариан зарар гъабхьи хизанариз дих гъапIну.
Дурарихьна илтIикIури райондин главайи къайд гъапIганси, къанундиинди гьюкуматдин терефнаан кюмек анжагъ чарасуз аьгьвалатнан режим мялум гъапIу вахтнатIан туври шулдар. Табасаран райондиъ дициб режим мялум гъапIундар ва, жара районариз мархьари туву зарарик тевган, Табасарандин аьгьвалат гъагъиб дар. Гьаци вушра, мархьари ва жил кучвубхну гъябгъювали агьалйириз хайлин зарар тувну. ВаритIан гъагъиди му дюшюшариъ хулар тикмиш гъапIу, амма думу хулариз саб жюрейинра документ апIуз хъудруркьу хизанариз гъабхьну. Урусатдин Президент Владимир Путинди дицдар хизанариз бюджетдиан дару фондариан кюмек апIуб табшурмиш гъапIну. Мягьямед Къурбанов, чан нубатнаан, гьарсаб адресназ хусуси кюмек тувбан ляхин тешкил апIури, райондиан жара йишвариъ яшамиш шулайи ватандашарихьна, меценатарихьна ва вижнасуз дару ватанагьлийирихьна илтIикIну.
Гьаци, нубатнан кюмек Калуга шагьриъ яшамиш шулайи ихь ватанагьли, меценат Гьяжимурад Гьяжиевдихьан гъафну. Думу касди зарар гъабхьи хизанариз 500 агъзур манат хътапIну. Думу пул райондин 18 хизандин арайиъ пай гъапIну.
«Багъри район штун селлери ккапIрайиган, ихь хайлин ватандашарихьан ва машгьур меценатарихьан гъирагъдиъ гъузуз гъабхьундар. Дурарихьан саки гьар йигъан рягьимлувалин кюмекназ дакьатар гъюра, мид’инди зарар гъабхьидариз шлубкьан ухди кюмек тувуз мумкинвал шулахьуз. Мархьли зарар туву саб хизанра кюмек дарди гъузидар.
Гъи вари райондин агьалйирин терефнаан ихь ватанагьлийириз кюмек гъапIу Гьяжимурад Гьяжиевдиз чухсагъул пуз ккундузуз», – гъапну Мягьямед Къурбановди.