Наргиз Гюлечова
Майдин вазлин йицIихьударихъанмина Дагъустандиъ туристар кьабул апIру фасил ккебгъна. Ккудубшу йисандин статистикайин улупбариинди, республикайиз саки 2 миллионкьан хялар гъафну. Ццира республика гьадму кьадар туристар кьабул апIуз гьязур шула.
Урусатдин гидар Дагъустандиз
Майдин 20-24 йигъари РД-йин туризмйин ва халкьдин сянаяьткарваларин министерствойи Урусатдин жюрбежюр регионариан туризмйин цирклиъ ляхин апIурайи гидариз Дагъустандихъди ва республикайиъ туризм артмиш апIуз айи мумкинваларихъди таниш апIуб себеб вуди, тур тешкил гъапIну. Регионар Дагъустандихъди таниш апIбан программайин дахилнаъди республикайиз Москвайиан, Санкт-Петербург-диан, Уфайиан, Екатеринбургдиан, Саратовдиан, Нефтеюганскдиан, Сама-райиан ва Новороссийскдиан туроператорар гъафнийи.
Сабпи нубатнаъди дурар Мягья-чгъала ва Каспийск шагьрариъ туристар кьабул апIру гостиницйирин ляхнихъди таниш гъахьнийи. Дидин кьяляхъ республикайиз дуфнайи гидар Сулакдин дараскьал нириз ва туристар кьабул апIру «Главрыба» комплексдиз гъушну.
Республикайиз регионариан дуфнайи туризмдин цирклиъ лихурайи пишекрар Кьибла Дагъустандихъди таниш апIбазра программайиъ жаради фикир тувнайи. Асас вуди хялар Дербент шагьриъ ва Ахьцигь райондиъ туристар кьабул апIру, дурар дахъру-гъудужвру йишварихъди таниш хьуз гъушнийи.
4-5 йигъандин арайиъ регионариан дуфнайи гидари республикайин туризмйин цирклин инфраструктура ахтармиш апIбан кьяляхъ Дагъустан туристар гъюбахьна гьязур духьнайивализ заан кьимат дивнийи.
«Салам, Дагъустан»
2-пи июндиан 9-пи июндизкьан Кьялан Азияйин ва Персияйин заливдин гьюкуматарин туризмйин цирклиъ лихурайи касариз кIури, Дагъустандиъ «Салам, Дагъустан» ччвур тувнайи сабсан мялуматарин тур тешкил гъапIну.
Му проект, республикайин туризмйинна халкьарин художествойин сяняаьткарваларин (НХП) министерствойи ва республикайин туризмйин центри региондин мумкинвалар харижи гьюкуматаризра тарагъувал метлеб ади, дурарихъди сатIиди ляхин апIуз кIури, уьмриз кечирмиш апIурайиб ву.
Республикайин туризмйинна НХП-йин министерствойин пресс-гъуллугънаан тувнайи мялуматариинди, саб гьяфтайин арайиъ проектдин дахилнаъди кIули гъубшу турин иштиракчйир республикайин туризмйин инфраструктурайихъди таниш гъахьну. Улупнайи программайиинди дурар Мягьячгъала, Каспийск, Дербент шагьрариз, «Каспий» санаторияйиз ва гьацира Сулакдин дараскъал нирихъди, Чиркейдин шид уьбхюрайи зурба бандлихъна, Нарын-гъалайиина, гъумран дагъ Сарыкумдиина ва хъанара жара йишвариз хъади гъушну.
Пуб лазим вуки, «Салам, Дагъустан» проектдиъ асас фикир республикайин халкьарин художествойин сяняаьткарваларин шей’ариз тувра. Дуфнайи хялар ихь культурайихъди таниш апIбан бадали, дурариз халачачивалиан, гакIвлиъ рукьдин накьишар тIаъри гьязур апIурайи унцIукIулин шей’ар гьязур апIбаан вуйи мастер-классарра улупнийи. Дурар гьацира Дагъустандин халкьарин хурагарихъди ва аьдатарихъди таниш гъапIнийи.
Гьяфтайин арайиъ Дагъустандихъди таниш гъахьи харижи уьлкйириан дуфнайи хялари, гьамусдихъантина республикайиз туристар хъади гъюри, сатIиди ляхин апIуз гаф тувнийи.
