Табасаран эскрар – Ватандин Аьхю дявдин иштиракчйир

 

Юсуф Мягьямедович Сафарялиев

1919-пи йисан Табасаран райондин Ергулигъ гъулаъ нежбрин хизандиъ бабкан гъахьну.

 

14 йис тамам гъабхьихъан мина лихурайи жигьилиз 1942-пи йисан фронтдиз гъахуз повестка гъафнийи. Учв инвалид вуйивализ дилигди, думу багъри Ватан уьбхюз гъушнийи. Дявдиз гъахурайи жигьилар айи эшелон Тбилисийиз гъафнийи.

Жикъи вахтнан арайиъ дявдикан ва яракьарикан аьгъювалар тувну, думу гаубартиллерияйин 850-пи полкназ кьабул гъапIнийи. Дявдин женгариъ иштирак шули, Юсуф Сафарялиевди вари Европа – Румыния, Венгрия, Чехословакия – ликриккан гъапIну. Дяви Берлиндиъ ккудубкIну. Багъри гъулаз думу 1947-пи йисан кьяляхъ гъафнийи.

Дявдиъ улупу игитвализ, Юсуф Сафарялиевдиз Ватандин дявдин II дережайин орден, «Дирбаш’вал улупбаз лигну» ва гьацдар жара гизаф медалар айи. Гьюрматлу ветеран 1987-пи йисан уьмриан гъушну.