Магьа нубатнан Гъалибвалин машкварра улубкьура. Му аьхю шадвалин йигъ багахь шули, ухьуз гьарсариз дидик пай киву ихь аьхю наслар, абйир-бабар, дурарин гафар, ихтилатар кIваин шулхьуз.
Ватандин Аьхю дявди чан дарвалар, гаш’валар улулупу хизан, инсан амийинхъа? Думу пис дявдин кьутIкьли дад саб хизандинра гъвалахъан тина гъубшундар, дявдин кум вари хизанарик кубкIну. Диди фукьан инсанарин уьмрар кьатI, бабар баярихъ, бицIидар абйирихъ, хпар жиларихъ, чйир, чвйирихъ мягьрум гъапIну. Дяви ккудубкIну 70-йис гъубшнушра, диди инсанарин кIваин гъиту зийнар гьелелиг сагъ духьнадар. Дявдин жергйириъ гъахьи агъзрариинди инсарикан ихь арайиъ гьамус лап цIидартIан имдар.
Улихьна йигъари узу Дербент шагьрин зегьметнан ветеранарин шагьрин ОМВД-йин ва ВВ-йин Советдин председатель, шагьрин ветеранарин тешкилатдин президиумдин член Агъагюлов Эмирбег Хидировичдихъди Дербент шагьриъ Ватандин Аьхю дявдин ветеранариз гьюкуматди фициб фикир ва кюмек тувраш, сюгьбат гъубхнийза.
– Гъийин йигъаз Дербент шагьриъ Ватандин Аьхю дявдин шубур иштиракчитIан имдар: Анна Николаевна Аьзизова (1924-пи йисан бабкан гъахьну); Даштамир МягьямедтIагьирович Дадашев (1922-пи йисан бабкан гъахьну); Антонина Александровна Исакьова (1927-пи йисан бабкан гъахьну).
Гьюкуматдира, шагьрин администрацияйин терефнаанра думу гъагъи женгариъ иштирак гъахьидар кIваълан гьаънадар. Дурар жумартвалиинди гьарсаб Гъалибвалин машквраъ ва жара тялукь серенжемариъ кIваина хура. Гъалибвалин 75 йисандин юбилейин программа тамам апIбан Дербент шагьрин комиссияйиз гьюкмин органарин ва идарйирин жавабдар гъулугъчйир дахил шула. Амма гъи вари дюн’яйиъ тарабгънайи коронавирусдин инфекцияйи юбилейиз гьязулугъ’валар ккуни къайдайинди апIуз гъитри адар. Гьаци вуйиган, ихь ветеранар ва администрацияйин гъуллугъчйир шагьрин майдандиина уч хьиди ва саб бицIидиси машкврин мярака гъабхиди.
Сенатор Сулейман Керимовди шагьриъ имбу шубур ветерандиз 1 миллион манат хъадапIну, гьадихъди сабси Дербент шагьрин администрацияйира гьарсариз 75 агъзур манат пул тувну.
Гьамусяаьт Ватандин Аьхю дявдин иштиракчйирин ачIни хпарин сиягьар гьязур апIура, хул’ан удучIвуз даршулайи ветеранариз чарасуз кюмекар тувра, дявдин иштиракчйир мектебариъ, вузариъ, техникумариъ урхурайидарихъди гюрюшмиш шула, ветеранариз Гъалибвалин 75 йис хьувалин юбилейин медалар тувра.
Дидлан савайи, Дербент шагьриъ Ватандин Аьхю дявдин 3 иштиракчийин хулариз гъягъюри, шагьрин администрацияйин гъуллугъчйири дурарин яшайишдин, сагъламвалин гьял ахтармиш апIура, лазим вуйи рягьимлувалин кюмекар тувра, дявдин ва зегьметнан ветеранариз, яшлу касариз гьарсаб машквриз ипIруб-убхъруб дивнайи столар ккабалгура.
Гъалибвалин машкврихъди тебрик апIури, дурариз жандин сагъ’вал, кIван шадвал ккун апIураза. Гъит, мицисдар дирбаш ветеранар ихь гъюзимбу наслариз нумуна ишри, дурарин гьунарар, марцци зегьмет кIваълан дурубшри.
