Гюльнара Мягьямедова
Улихьна йисари вари ухьуз лазим вуйиб-даруб, ипIруб-убхъруб, алабхьруб, жара сурсатар, бакришнар, техника гъадабгъуз базариз, туканариз гъягъюри шуйхьа. Гьамус инсанар, иллагьки жигьилар, базариз, ерли туканариз гъягъюри имдар. Гизафдари палтар урччруган кабхьру порошокра кмиди интернет–туканариан гъадабгъура. Жигьиларин фикриинди, лазим гъабхьи мутму интернетдиан гъадабгъуз гизаф рягьятди ву.
Селимат, 32 йис, шубур бицIирин дада: «Узуз шубур велед азуз. ВаритIан бицIинурин 4 вазтIан дариз. Учу яшамиш шулайи шагьур аьхюб дар. Амма узуз лазим гъабхьи мутму гъадабгъбан бадали, шагьрин гъирагъдиъ айи аьхю тукандиз душну ккунду. БицIидарра хъади ярхла тукандиз гъягъюб рягьят ляхин дар. Бязи вахтари аьхю тукандиъра лазим вуйи мутму бихъурдар. Гьаддиз узу интернет тукандиан ич багахь ачмиш дапIнайи пунктнаъ лазим вуйиб заказ апIури шулза. Интернет–туканариан гъадабгъру мутму гьарган узуз кьабул вуйибсиб шулдар, кьабул дархьиб тукандиъ кьяляхъра апIуз шулу».
Ав, гизафдари чпиз ккуниб интернет-туканариъ гъадабгъура. Думу туканариъ, гьацIишвари вушра, жвуваз вахт айиган, жвуваз гъулай вуйиган учIвуз шулу. Аьдати тукандиз гъягъюз гизаф вахт лазим ву, мидихъди сабси, тукан либхурайи вахтназ дилигну, жвуван планарра дигиш апIбакк ккубкьру. Къайд апIуб лазим вуки, аьдати туканариъси дарди, интернет-туканариъ кьиматарра исди шулу: дурари арендайиз гъадагънайи залар, коммунальный игьтияжар, душваъ лихурайидарин кьадар, дурарихъан туврайи пул ва маважиб лап цlиб ву. Харжар цIиб вуйиган, масу туврайи шей’арин кьиматарра исина ву.
Урусатдиъ чIатху 4 маркетплейсари ляхин апIура: «Яндекс.Маркет», «Сбер МегаМаркет», Wildberries, Ozon. Гьадрарикан мутму гъадабгъуз варитIан рягьятдар аьхиримжи кьюбидар ву.
Wildberries ва Ozon манзилнаъди мутму гъадабгърударин уьмриз ижмиди дуфна. Думу компанйири йисандин арайиъ миллиардариинди гъазанжар гъадагъура. Муштарйир туканарин кьиматариканра разиди ву.
«Мушваъ мутму гъадабгъу касди гьаддикан чан фикрар ачухъ апIуру йишвра а. Думу фикрар мутму ишлетмиш апIбан кьяляхъ дикIурайидар ву. Жвуву заказ гъапIу мутму хуларин багахь хьайи пунктназ пулсузди хуру. Душваъ мутму увуз кьабул шулуш, ахтармиш апIуз шулу. Хъа саб тафавутвал а: 2022-пи йисхъанмина маркетплейсди мутму кьяляхъ апIбахъан пул бисура. Эгер увуз заказ гъапIу мутму кьабул дархьиш, бязи вахтари пулсузди думу кьяляхъ тувуз шулдар. Кьяляхъ апIруган, 50-100 манат гъадабгъуру. Кьабул дархьи мутму кьяляхъ тувбахъан пул, аьдат вуди, маркетплейсариъ цIибтIан мутму заказ дарапIрударихьан гъадабгъуру.
Мисалназ, шубуд йисандин арайиъ узу 75 агъзур манатдин мутму заказ гъапIунза. Гьадму кьадарнакан 87,1 % мутмйир масу гъадагъунза. Думу ужуб улупуб ву, гьаддиз узу мутму кьяляхъ гъапIишра, узкан пул ктабгъурадар.
Узу маркетплейсдиъ гизафси бицIидариз палтар, китабар, хулаъ ишлетмиш апIру техникайин алатар ва хайлин жара шей’ар заказ апIури шулза. Гьаму жюрейиинди хулаз лазим шлу мутму гъадабгъури, хизандин бюджет кьяняаьтлуди харж апIуз мумкинвалар агураза», – ктибтура йиз сюгьбатчи Селиматди.
Гьамци, маркетплейсар арайиз гъафихъанмина инсанар туканариз гъягъюб яваш дубхьна. Маркетплейсари чпи гъабхурайи ариш-веришдин ляхнар алверчйиризра, муштарйиризра пучIу дапIна. Думу гъийин деврин гъулай мумкинваларикан саб вуди гьисаб апIуз шулу.
