Наргиз Гюлечова
Июндин 3-пи элгьет йигъ Урусатдиъ медицинайин пишекрин йигъси къайд апIура. Цци му пишекарвалин машквар 21-пи июнди къайд гъапIну. Му йигъахъди аьлакьалу вуди гьар йисан газатдин машариъ учу чпин ляхниъ гьунарар улупу касарикан бикIури шулча.
«Йиз жилир медицинайин кюмек вахтниинди дархьбаан уьмриан гъушур вуйиз, гьаддиз, эскрариз кюмек апIувал йиз буржиси вузуз» кIури ккебгънийи ич сюгьбат Гюльмира Керимовайи.
Къайд апIуз ккундузуз, Гюльмира Керимовайин уьмрин юлдаш Рафик Керимов хусуси метлеб айи дявдин операцияйиъ 2023-пи йисан июндин вазли уьмриан гъушну. Дугъкан вуйи «Уьмриз планар дивну, уьмриан гъушну» макьала гьаму йисан 14-пи майди чапдиан удубчIву «Табасарандин нурар» газатдин 18-пи нумрайиъ тувнийча.
Гюльмира Керимовайиз, учв бицIиди вуйихъанмина, чан уьмур анжагъ медицинайин цирклиътIан рябкъюри адайи. Гьаци вуйивализ лигну, 2009-пи йисан Табасаран райондин Халгъарин кьялан мектебдиъ 11-пи класс ккудубкIну, думу Дербентдин медицинайин училищейик урхуз кучIвру. Училищейиъ кьюбпи курс ккудубкIбалан кьяляхъ, Гюльмирайина Рафикди чпин хизан ккебгъру. Думуган Рафикди Урусатдин яракьлу кьувватарин жергйириъ Ханкалайиъ гъуллугъ тамам апIурайи. Жигьил швушв чан урхуб ккудубкIну, кадабгънайи ляхнин пишекар ишри кIури, Рафикди думу чан абйир-бабарихъди гъитну, хъа учвсана гъуллугъ апIурайи йишваъ яшамиш шули гъахьну.
«Юкьуд йисандин арайиъ, 2009-пи йис’ан 2013-пи йисазкьан, узу медучилищейиъ урхури гъахьунза. Аьхиримжи курснаъ айиган учуз ич сабпи веледра гъахьунчуз. Сарун узу медицинайин пишекар духьну ашра, риш гьеле лап бицIиди вуйивализ лигну, ляхниъ учIвундайза. Думуган Ханкалайиъ яшамиш хьуз хъюгънийча. 2014-пи йисан шуран йисна гьацI гъабхьиган, думу бицIидарин багъдиъ айи яшнан варитIан бицIидариз вуйи дестейиз тувну, ляхниъ учIвуз ккун гъабхьнийзуз. Амма гьадму вахтна Рафик ляхниан удучIвнийи, ва Дербентдиз кьяляхъ гъюз мажбур гъахьича. Дербентдиз гъафиган ич хуларин багарихь хьайи аптекайиъ лихуз хъюгънийза», – ктибтнийи йиз сюгьбатчийи.
Гюльмира, аптекайиъра ляхин апIури думукьан вахтназ имдайи, фицики дугъаз чан пишейин ляхин апIуз яманди ккунди айи. ЦIиб вахтналан думу Дербентдиъ медицинайин центриъ медсестради лихуз хъюгънийи. Кьюд йисандин арайиъ дугъу гьадушваъ аьзарлу касариз кюмек туври гъахьну.
«Думу центриъ гизаф ужуб коллективра вуйи. Дурарихъди жвуван чвйир-чйирихъдиси гъахьнийза. 2016-пи йисан йиз уьмрин юлдши Буйнагъск шагьриъ эскервалин ляхин тамам апIуз хъюгънийи. Сарун ккундушра, ккундаршра ляхниан удучIвну, учура дугъахъди гьадина гъушнийча. Буйнагъскдиъра аптекайиъ лихуз хъюгънийза. Сад йисантIан артухъ вахтналан, учуз кьюрпи велед –бай гъахьиган, ляхниан удучIвуб алабхънийзуз. Кьюбрид веледарра бицIидарин багъдиз тувну, 2023-пи йисан 1-пи январихъан хъюгъну Буйнагъскдиъ айи «111» кIуру медицинайин центриъ медсестради ляхин апIуз хъюгъза. Душваъ 2025-пи йисан 1-пи апрелизкьан лихури имиза», – гъапнийи медсестрайи.
Узу зиихъ къайд гъапIганси, Гюльмирайин уьмрин юлдаш Рафик Керимовди 2023-пи йисан хусуси метлеб айи дявдин операцияйиъ Ватан бадали чан жан тувну. Хъа сарун жилир амдарди ялгъуз духьнайи жигьил дишагьли, чан веледарра хъади, Каспийск шагьриз кюч шулу.
«Каспийск шагьур узуз танишуб дайзуз. Мина учу гъафнушра, наанкIа учIвну, ляхин апIидиза кIуру фикиркьан кIулиъ адайиз. Зат хул’ан удучIвуз ккун шулдайзуз. Ляхниъ учIвуз юкIв хъашра, узу эскрариз кюмек тувувал буржиси гьисс апIурайза, гьаз гъапиш йиз уьмрин юлдаш зиян хьпан кьяляхъ медицинайин кюмек вахтниинди дархьбаан кечмиш гъахьир ву.
Эгер ляхниъ учIвруш, гьадму себеб вуди, йиз уьмур эскрариз кюмек апIбаз бахш апIуз ккундийзуз. Магьа йиз мурадар тамам гъахьну — цци мартдин вазли Урусатдин оборонайин министерствойин дахилнаъ айи Мягьячгъалайинна Каспийск шагьрарин арайиъ тазади ачмиш гъапIу эскервалин 419-пи госпиталиъ лихуз дих гъапIунзуз.
ИкибаштIан, разивалиинди теклиф кьабул дапIну, юкIв али ляхин давам апIуз хъюгъза. Эвелиан терапияйин отделениейиъ медсестради лихури гъахьунза. Саб вазна гьацIан арайиъ душваъ ляхин гъапIхъан, узу, госпиталин начальникдин буйругъниинди неврологияйин отделениейиз аьхюну медсестради гьаънийи. Гьаддихъанмина гьадушваъ узуз табшурмиш дапIнайи ляхнар давам апIураза», – кIура Гюльмира Керимовайи.
Му шуру ляхин апIурайи отделение, хусуси метлеб айи дявдин операцияйиъ гъагъи зийнар, контузйир гъахьи эскрар кюмек ккун апIури илтIикIурайи отделение ву.
«Аьхюну медсестрайин вазифйир госпиталиъ марццишин апIурайидарин гюзчивал гъабхьуб ву. Вушра узу гизафси аьзарлуйирихъди шулза. Мина гъафи касариз кюмек туври, дурарихъди гаф-чIал апIруган, йиз кIвазра рягьят шулиз. Лик ккадарди, хил хъадарди вая жара гъагъи зийнар духьну госпитализ гъюрайи эскрариз медицинайин терефнаанси, психологияйин жигьатнаанра гаф-чIал апIруган, ухди кюмек шула», – аьлава гъапIнийи Гюльмира Керимовайи.
