Зубайдат Шябанова

Комиссия багарихьди гъиди

Гьаму йигъари Мягьячгъала шагьриъ Табасаран райондин глава Мягьямед Къурбанов РД-йин тикилишчивалин, архитектурайин ва ЖКХ-йин министр Бахтияр Уллаевдихъди гюрюшмиш гъахьну. Дурар алахъбан асас себеб муниципалитетдиъ мартдин вазли гъургъу аьхю мархьарин натижайиъ гъахьи зарарарихъди аьлакьалу вуйи.
Мягьямед Къурбановдин гафариинди, райондиъ аьгьвалат гъагъи гьялназ дуфна. ТIюрягъ, Куркакк, ГьепIил, Ярса гъуларин поселенйириъ ва Дарвагъ гъулаъ жилар кучвурхну гъюбан дюшюшар шула ва дурари инсанар яшамиш шулайи хулариз хатIа тувра.
«Райондин хатIалу аьгьвалатназ кьимат тувру комиссия жилар кчвурхурайи йишвариина гъушну. Дурари гъуху ахтармишарин натижайиъ 13 хулаз аьхю хатIа айивал мялум гъабхьну. Думу хулариъ 54 кас яшамиш шула. Дурар вари вахтназ вуди багахьлуйирихьна гьаъна. ВаритIан гъагъи аьгьвалат Куркакк ва ТIюрягъ гъуларин поселенйириъ арайиз дуфна. Гьамусяаьтра думу гъулариъ жилар кучвурхувал яваш дубхьнадар, 27 хал хатIайикк кка», – гъапнийи Мягьямед Къурбановди.
Гьаддихъди аьлакьалу вуди, райондин кIулиъ айири министрикан Табасаран райондиз шлубкьан ухди къайд дапIнайи гъулариъ инженервалинна геологический ахтармишар гъахру пишекрар гьауб ккун гъапIну.
Бахтияр Уллаевди къайд гъапIганси, гьамусяаьт комиссияйин вари вакилари Дагъустандиъ лапра аьхю зарар гъабхьи районариъ ва шагьрариъ ляхин апIура. Гьаддихъди сабси, министри чан заместитель Салам Гьясайниевдиз Мягьямед Къурбановди гъапи гъулариз пишекрар гьауб табшурмиш гъапIну.
Минстройин комиссияйи ахтармишарин кьяляхъ адабгъу натижа гележегдиъ кьабул апIру уьлчмйирин асас документ хьибди. Гьадму документ адарди гьелелиг саб жюрейин къарар кьабул апIуз райондин кIулиъ айидариз ихтияр адар.

Райондиъ цIийи мектебар дивру

РД-йин тикилишчивалин, архитектурайин ва ЖКХ-йин министр Бахтияр Уллаевдихъди вуйи гюрюш хьували Мягьямед Къурбановди Табасаран райондиъ гъагъи гьялназ дуфнайи мектебарин месэлара гьял гъапIну.
Гьаци, Гюгьрягъ ва Жулжагъ гъулариъ цIийи мектебар тикмиш апIуз проектдинна сметайин вари документар, гьюкуматдин экспертизара ади, гьязурди а ва дакьатарра жара дапIна. Багахь йигъари торгйир мялум апIиди ва дурар тикмиш апIру подрядчик мялум хьиди. Документариъ улупнайиганси, ляхнар 2026-пи йисан ккергъди ва мектеб 2028-пи йисан ккудубкIну ккунду.
Хюрккарин мектебдикан улхуруш, тикилишчивалин ляхнар аьхирихъна гъюра. Думу ляхнарин заказчик РД-йин минстрой ву. Гьаддихъди аьлакьалу вуди, Мягьямед Къурбанов министрихьна, гьаму йисандин аьхириз мектеб ккудубкIбан бадали, тикилишчивалин ляхнарик гьяракат кипуб ккун апIури илтIикIну.
Къурбановна Уллаев СертIил гъулан мектебдикан жаради гъулхнийи. Думу мектебдин проектдинна сметайин документар гьязурди а, гьюкуматдин экспертизайин терефнаан разивалра дуфна. Тикилиш федеральный программайик кипну, амма гьелелиг дидиз дакьатар жара дапIнадар.
Акъа ва Пилигъ гъуларин мектебариз проектар тартиб апIуб табшурмиш дапIна. Мягьямед Къурбановди министрикан думу мектебарин проектдин ляхнар кергъуз пулин кюмек ккун гъапIну. Бахтияр Уллаевди кюмек апIуз ва думу месэла РД-йин оперативный штабдин улихьна адабгъуз гаф тувну.
Гюрюшдиъ Дарвагъ гъулан 1-пи ва 2-пи нумрйирин мектебарикан, Мягьрягъ гъулан 1-пи нумрайин мектебдикан, гьацира СиртIич гъулан мектебдин ккергъбан классар ерлешмиш духьнайи дараматдиканра гъулхнийи. Вари кудухнайи мектебариз жилин йишвар жара дапIна ва лазим вуйи документар гьязурди а. Амма республикайин бюджетдиан дакьатар гьамусра жара дарапIувализ лигну, проектарин ляхнар ккергъуз шуладар. Му меселара республикайин дережайиъди гьял апIбаз ккилибгура.
Мягьямед Къурбановди Уллаевдиз му проектар кьан дарапIди гьял дапIну ккуниваликан гъапну, фицики думу месэлйир гьял апIуваликан урхурайидарин хатIасузвал асиллу шула.
Тикилишчивалин министри чан нубатнаъ арайиз адагъу вари проектар вахтниинди гьял апIру рякъяр агуз кюмек апIбан гаф тувну.

Рякъяр къайдайиз хура

Табасаран райондин глава Мягьямед Къурбанов ва райондин «РСУ» АО-йин начальник Эседулла Аьбдуллаев Дагъавтодорин кIулиъ айирин заместитель Замир Умахановдихъди гюрюшмиш гъахьну. Дурари ЦIийи Лижва гъулан багахь, федеральный мяна айи рякъюн 45-пи километриъ айи гъяд абхъувалин ва дидин ерина таза гъяд дивувалин месэла гьял гъапIну.
КIваин апIуз ккундучуз, улихьна йигъари Табасаран райондиз гьадму гъяд абхъу йишв’ина тяди уьлчмйир кьабул апIбан бадали, Дагъавтодорин комиссия гъафну. Дурари абхъу гъядун багахь вахтназ вуди рукьан гъяд (САРМ) тикмиш апIруваликан ва гележегдиъ абхъу гъядун йишв’ин деврин тIалабариз жаваб тувру цIийи гъяд дивруваликан гъапнийи.
Гьамусяаьт вахтназ вуйи гъядун проектдинна сметайин документар гьязурди а. Думу ляхнар башламиш апIбан бадали, тикилишчйир ужудар гьавйириз ккилигура. Ригъар гъахьибси, подрядчик ляхнарихъ хъюгъру.
Мидланра гъайри, гюрюшдиъ райондин аьтрафариин али федеральный ва республикайин мяна айи рякъяриканра гъулхнийи. Хючна – Хьарагъ, Хючна – Халагъ, «Кавказ» – СиртIич – ТIаттил, гьацира Мамедгъала – ТIаттил – Хючна ва Дербент – Хючна – Хив рякъяриъ зарар гъахьи йишвар гизаф а. Вари гьаму рякъяр рас апIуз РД-йин главайи чан къарарниинди табушурмиш дапIна. Гьамусяаьт жавабдар касар думу йишвар рас апIуз пулин дакьатар жара апIайиз ва гьавйир мани хьайиз ккилигура.