Гюльнара Мягьямедова

Дербент райондин Мамедгъала поселокдиъ апрелин садпи йигъари гъургъу аьхю мархьарин натижайиъ шид убчIвну хуларихъ мягьрум гъахьи агьалйириз цIийи хулар тикмиш апIура. Ляхин лап жанлуди кIули гъябгъюра, республикайин улихь-кIулихь хьайидари тикилишчивалин ляхнарин зиин гьар йигъандин гюзчивал гъабхура.

 

4-пи июли Дагъустандин Прави-тельствойин председатель Мягьямед Рамазанов Дербент райондин Мамедгъала поселокдиъ гъягъюрайи тикилишчивалин ляхнар ахтармиш апIуз гъушну. Дидин гьякьнаан Дагъустандин правительствойин мялуматарин гъуллугъну хабар тувра.
Тикилишчивалин ляхнар гъахурайи йишв’ин гъубху совещаниейиъ Мягьямед Рамазановди жавабдар касарихъди ляхнин месэлйир гьял гъапIнийи. Совещаниейиъ къайд гъапIганси, аьхиримжи кьюб гьяфтайи хулар тикмиш апIбан гьяракат за гъабхьну. Тикмиш апIурайи хулариъ дурар катIбан, арсбан инженервалин цирклин ляхнарра гъахура, хуларин багахь аьтрафар ккабалгура. 52 хулар саки ккудукIна, агьалйириз чпиз рукьру хулар улупна. Кми-кмиди гъюри, дурари хулариин гъахурайи ляхнар ахтармиш апIура.

Диврайи гьарсар хулариъ шубуб дахъру хал, хялар кьабул апIру аьхю хал, манишин тувру гъурулуш а, коммуникацйирра ккивна. Хуларихъна газ зигуз ва багахь аьтрафар ккабалгуз ими. Подрядчикди правительствойин кIулиъ айириз гаф тувганси, хулар август вазлин гьацIариз эйсйир кьабул апIуз гьязур хьиди.

Мамедгъалайиъ гьацира гъадаргъу хуларихъан ва чIур гъабхьи мутмуйихъан компенсация гъадабгъуз ккунидарихьан аьрзйир кьабул апIбан ляхнарра давам шула.