Ураза-байрам вари мусурмнарин кьюб асас машкврарикан сабпиб ву. Урусатдин Федерацияйин 9 республикайиъ думу йигъ ляхин дарапIру йигъси тяйин дапIна. Думу регионариъ аьхюну пай агьалйири ислам дин хъапIра.
Аьдат вуйиси, машкврин йигъан мусурмнар машкврин гъудгниз мистариз, накьварихъна садакьа хьади гъягъюру, касибвал кайидариз садакьа пай апIуру, хулариъ вари жюрейин меълишнар, хурагар гьязур дапIну, багахьлуйир, дустар хяларди гъювализ ккилигури шулу. Хъа гьаму йисан ихь дюн’яйиъ COVID-19 уьзур тарабгънайивалихъди аьлакьалу вуди, машквар аьдати жюрейиинди къайд апIуз шлуси дар. Хъа фукьан читин гьялнаъ ашра, ухьу Аллагьу Тяаьлайиз икрам дапIну ккунду. Дидин гьякьнаан Дагъустан Республикайин муфтиятди мялуматар тувна.
Гъийин читин аьгьвалатнаъ, чIуру уьзри гизаф кьадар ихь гъардшарин ва чйирин уьмрар гъахурайи вахтна, Ушварин машквар фици къайд дапIну ккундуш ктибтувал ккун апIури, газатдин редакцияйин журналист табасаран чIалниинди чапдиан удубчIвурайи «Ас-салам» газатдин редактор, Табасаран райондин имам Ансар Рамазановдихьна илтIикIну.
«Ассаламу аьлейкум, гьюрматлу ватанагьлийир! Ухьу Ушварин машкврин йигъахьна багахь шулахьа. Учву вари улубкьурайи гирами машкврихъди кIваантIан тебрик апIураза. Аллагьу Тяаьлайи ихь гьарсари гъидису ушвар, гъапIу гъудгнар кьабул апIри.
Гъи ихь кIул’ина читин йигъар дуфна. Аьзарлуйирин кьадар артухъ дархьбан бадали, духтрарин тIалабар тамам апIувал чарасуз лазим ву. Гьарсар касди машквар жвуван хулаъ къайд апIувал чарасуз ву. Гьаддиз имамарикан, жямяаьтдикан ккун апIурача: мистаз дурушди, машкврин гъудган хулаъ апIинай. Хулариз гизаф кьадар багахьлуйириз ва дустариз теклифар мапIанай. Сари тмунурин машквар телефондиан тебрик дапIну гъитай. Гьяйифки, ихь арайиъ му уьзур тарабгънайивалихъ хътругъру инсанарра а. Хъа жвуван кIул’ина думу гъафиган, гьарйир гъапIну кIури, кюмек шулдар.
Ушварин сеэр тувбакан улхуруш, саб Табасаран райондиъ сумчIуртIан артухъ мискинар, фагъирар а. Гьаддиз цци ушварин сеъ гьадрариз уч апIурхьа. Жвув яшамиш шулайи райондиъ мюгьтаж’вал айи касар адар кIури, ушварин сеъ жара йишвариз хътапIуз хай шулдар. Ухьу сабпи нубатнаъди ихь районариъ яшамиш шулайи мискинар-фагъирарихъан жавабдарвал гъабхурахьа. Эгер ичв гъулаъ мискинар, фагъирар ва гьацира ушварин сеъ рубкьру жара инсанар адарш, думу ляхнихъан жавабдарди дерккнайи касдихьна зенг дапIну, сеъ гьадгъахьна рубкьай. Саки вари гъулариъ ушварин сеъ уч апIру инсанар дерккна. Эгер ушварин сеъдин гьякьнаан суалар арайиз гъюраш, телефондин 8(964)0040179 нумрайиз зенг дапIну гьерхай.
Му машквриз Ухьу аьхюдарси бицидарра ккилигури шулу. Аьдат вуйиганси, дурар машкврин йигъан гвачIнинган багахьлуйирихьна, гъуншйирихьна меълишнар, пешкешар уч апIуз гъягъюри шуйи. Гьаму йисан бицIидар меълишнар уч апIуз хул’ан маадаанай. БицIидар айи хулариъ аьхю яшнан инсанарра ади хьуз мумкин ву. Гьадрарин сагъламвализ зарар тувбан тахсиркрар бицIидар хьуз мигъитанай.
Гъит Первердигар Аллагьди ухьуз гьаму гъагъи аьгьвалатнаан удучIвуз мумкинвал туври», – къайд гъапIну Ансар Рамазановди.
