Ктабхъурайи урхбан йис Хив райондиъ 11-пи классариъ урхурайи 114 ва 9-пи классариъ урхурайи 217 выпускникди ккудубкIиди.
Дурарин урхбан йис, аьхиримжи зенгнан сес ва гьенг муганайиз дарубсиб шлувалин ухьу вари шагьидар хьиди. Фицики дурариз, COVID-19 уьзур багьна дубхьну, мартдин вазлихъан мина мектебар рякъюз мумкинвал гъабхьундар.
Гьаму йигъари дурарин ухди ккудубкIу урхбан йискан, гележегдиз вуйи планарикан, кадабгънайи пишекарвалин рякъкан сюгьбат апIури, 11-пи классдин выпускникарихьна илтIикIунза.
Аьзиз Аьзизов, Асккан-Ярккарин кьялан мектебдин выпускник:
– Мектеб, саб «юкьуб» ктарди, вари «хьубариз» ккудубкIураза. Закурин йигъкан ухди миди фикир дапIну айза. Йиз уьмрин рякъ контрактдиинди ватан уьбхру гъуллугънаъ гъябгъиди. Гьеле 7-8-пи классариъ урхури амиди физкультурайин, ОБЖ-йин, зегьметнан дарсариин машгъул вуйза. Гьаддихъан мина мектебдиъ, гъулариъ, гьам райондиъ, гьамсана республикайиъ зиихъ узу кудухнайи дарсариан талитар гъягъруган, гъулан волейболин командайиъра иштирак шули, саб хайлин грамотйирин, кубокарин, медаларин сагьиб гъахьунзу. Гьелбетда, улихь хьайи ЕГЭ-йин имтигьянар фила ва фици шулуш жаваб адарди, гьелелиг фукIа пуз шулдарзухьан, хъа вушра Мягьямед Нурбагьандов, Марат Рахметов, Зейнудин Батманов ва хайлин жара гьацдар игит ватандашар рякъюрайивали, халкь бадали жанар туву игит касариз жямяаьтлугъди лайикьлу кьимат туврайивали кадабгънайи пишекарвалин рякъюъ хъуркьувалар гъадагъуз имбубсан юкIв капIразук. Ва, ихь халкьдин бажаранлу шаир, милли игит Кьалухъ Мирзайи гъапиганси, душмни цIа кипуз ният гъапIиш, думу цIин аржлариин дугъан кабаб дивуз, лазим гъабхьиш, гьаци жвуван Ватан бадали жан дивуз гьязур вуза.
Перзиман Маллакьурбанова, Ляхлаарин кьялан мектебдин выпускница:
– Мектеб ужудар хъуркьувалариинди ккудубкIури аза. Эгер математикайиан саб бицIи ликувал ктайиш, ич мектебдин директори кIурайиганси, гъизилин медалин сагьиб шуйзу. Якас, баладар. Вари улихь хьими. Узу гьеле 9-пи классдиъ урхури амиди духтирвалин пише кадабгъну айза. Думу ктабгъувалиъ йиз гъахи чуччун эгьемиятра аьхюб гъабхьну – Зарифа Аьрифовна Тюмень областдиъ Мегион кIуру аьхю дару шагьриъ духтирди лихура, ва дугъан ляхнихьна вуйи янашмиш’вал, марцци лизи палат узуз гъи нумуна духьна. Мидланра савайи, узуз инсанариз кюмекназ бакар хьуб гьарган кьабулди вузуз. Гьамусяаьт ихь ватанагьлийирин уьмур бадали, дурар аьжа-ликкан ккадагъуз ният ади, хилар хъержвну, чпин жанар фида апIури, духтрар гьяфтйириинди лихура. Гьаддира узуз му ляхнихъ юкIв хъивуз, закурин йигъан халкьдин ицц-рушназ дарман хьуз кьувват тувразуз.
Малика Нежефова, Мажвгларин кьялан мектебдин выпускница.
– Мектеб дици харжиди ккудубкIури адарза – шубуб «юкьуб», имбудар вари «хьубар» вуйиз. 5-пи классдихъан мина аьхю аьшкьниинди ва иштагьниинди урус чIалнан ва литературайин дарсариз гъягъюри гъахьунза. Гьелбетда, А.Макаренкойи гъапиганси, дарс ккун хьпан бадали, сифте дарс киврайи мялим ккун духьну ккунду. Гьаци узузра учуз урус чIалнан ва литературайин дарсар киврайи мялим Сабина Гьюсейбалаевна ккун гъахьунзуз. Йиз бахтнаанси, думу йиз гъардшиз кьисмат гъахьну. Гьаддиз йиз уьмриъ дугъан пишекарвалин ляхни аьхю йишв гъибисну. Аллагьдин амурнаан, имтигьянар тувбалан кьяляхъ, узу ДГПУ-йин дагъустандин филологияйин факультетдик урхуз кучIвдиза. Бабан чIалнахьна ва литературайихьна хатир-гьюрмат дубграйи касар хайлин рякъюразуз, гьаддиз дурарин веледарин, яна гъюз имбу насларин арайиан бабан чIалнан ва литературайин ирс дудрубгуз зегьмет зигурайи касарихъди — мялимарихъди, шаирарихъди, аьлимарихъди – сабси му баркаллу ляхник йиз пайра кивуз ккундузуз.
Къайд ва субут дапIну ккундуки, гъи вари выпускникариз, муганайиз вуйи выпускникарихьанси дарди, чпихьан, аьхиримжи зенгназ бахш вуйи мяракайиъ дийигъну, чпиз дарс киву мялимариз ва мектебарин администрацйириз чухсагъул пуз, я зарафат вуди гъапIу гаф-чIалназ хил алдабгъну, багъишламиш апIин, жан мялим, пуз дархьиваликан, чпихъди хъайи баяр-шубариз, ярар-дустариз пуз ккимбу гафарикан, аьдат вуйиганси «гежехайир, йиз мектеб» пуз дархьиваликан, кьюб ваз улихьна мектеб ккудубкIуваликан аьхю дерд ва хажалат ка.
Гьюрматлу выпускникар! Гьарсар халис мялимдин метлеб – жвуван веледдизси дарс кивнайи баяр-шубар, адмивал дудрубгди, лазим вуйи аьгъювалариинди имтигьнар тувну, аттестатар гъадагъну, чпи кадабгънайи пишекарвалин рякъюъ умудлуди гъягъювал ву. Узу йиз ва гъарашугъарин терефнаан учвуз, хъуркьувалиинди имтигьнар тувну, кадабгънайи рякъ-хулиъ ужудар пишекрар ва албагу хизан-кюлфетдин эйсйир хьувал ккун апIураза. Эгер гьаму вари шартIар лазим вуйи къайдайиинди учву гъюрхиш, аьгъю йибхьай – мялимдиз вуйи варитIан аьхю чухсагъул гьамдиъ а.
Гъит ичв закурин йигъ ягъурлуб, уьмур ва гележег акуб ишри, гьюрматлу выпускникар!
