Майин 12-диъ вари халкьарин медсестрйирин Йигъ къайд гъапIнийи. Му пишейин сагьибар гъи, республикайиъ духтрарихъди сабси коронавирусдин тIягъвнин улихьишв гьадабтIури, йигъ-йишв дарпиди больницйириъ аьзарлуйирин уьмрар аьжалин бацариан уьчIюгъбиин машгъул духьна. Гъи узуз газат урхурайидар Дербент шагьрин ЦГБ-йиъ аьхюнур медсестради лихурайи Мадина Батыровайихъди таниш апIуз ккундузуз.

 

Мадина Ражабовнайи 15 йисан Роспотребнадзориъ ляхин гъапIну, хъа аьхиримжи 5 йисан думу Дербент шагьрин ЦГБ-йиъ лихура.

– Мадина Ражабовна, яв ляхникан ва гъийин читин агьвалатнаъ уву тамам апIурайи вазифйирикан ктибтуб ккун апIураза.

– Халкьдиз гъуллугъ апIувал – ич буржи ву. Хъа гъи ич больницайин коллективдин асас вазифа – му фендигар уьзур кубчIвнайидариз сабпи нубатнан кюмек тувувал, дурар аьжалихьан уьрхювал ву.

Гъи Дербент шагьриъ коронавирусдихьди ва пневмонияйихъди вуйи аьгьвалат лап читинуб ву. Гьаддиз шагьриъ коронавирусдин инфекцияйин уьзрихъди аьлакьалуди госпиталар ачмиш дапIна, душвариъ медсестрйири, духтрариз кюмек апIури, гьяфтйириинди йигъар адаура. Дупну ккундуки, ич больницайин коллектив чпин пише ужуди аьгъю пишекрарикан тешкил дапIнайиб ву. Дурар чпин вазифйирихьна дикъатлуди янашмишра шула. Гьаци дарш, ляхин апIуз читинди алабхъуру, фицики аьзарлуйин сагъламвал, чаз духтрари фици кюмек тувиш, гьаддикан асиллу ву. Хъа учу учхьан шлу жафа зигури ача.

Ич госпиталариъ гизаф пай му коронавирусдиан аьзарлу хьуз варитIан хатIа айидар – гъагъдиъ айи дишагьлийир ву. Гьаз гъапиш дурарин иммуный гъурулуш зяифди шулу. Гьаддиз гьямила духьнайидари артухъси ихтиятвал дапIну ккунду

– Газатдин машнаан тина ихь ватанагьлийирихьна илтIикIну, фу пуз ккундувуз?

– Гьюрматлу инсанар, гъачай варидари сатIиди му уьзрихъди женг гъабхухьа. Варидариз читинвал кайиб аьгъяхьуз, амма ухьу жафа дизригиш, му уьзриккан ухьу азад хьидар. Пишекрарин гафариинди, коронавирусдин тIягъюн гьелелиг яваш хьуз ккадар. СацIиб мичIлишнар гъахьибси, уьзур, аьксина, хъана яркьуди тарабгъуб мумкин ву. Гъаддиз ухьу ихь жан манишнаъ уьбхюри, ухьуз дупнайи сягъниинди хулариъ гъузну ккунду.