Магьа хабарсузди хьадра улубкьну. Аьдат вуйиси, хьадан вазари шагьрариъ яшамиш шулайидар Каспий гьюлихъна жикIуз, гъумриин дахъуз гъягъюри шулу. Амма цци шагьристанарихьан имбу йисариси гьюликан мянфяаьт ктабгъуз шлуганси дар.

 

Республикайиъ айи Роспотребнадзорин Управлениейи Мягьячгъала шагьрин вари пляжарин зиин гъубху гюзчивалин натижайиъ къарар адабгъну: гьюлин шид бактерйирихъди лап кьалуди вуйивализ лигну, 10-пи июндихъан мина агьвалат ужу хьайизкьан гьюлик жикIуз къадагъа дапIна. Му къарариз иб тутруври, гьюлик гъижикIу касари «кишечная палочка» уьзур гъазанмиш апIуз мумкин ву. Дидланра савайи, му къарар батIул апIурайи касарихьна РФ-дин къанундиинди уьлчмйир кьабул апIиди.

Роспотребнадзориан вуйи мялуматариинди, гьюл мици кьалуди хьувалин себеб – гьюлин гъирагъдихъ яшамиш шулайи агьалйирин канализацияйин кьалу штар гьюлизди деетнайивал ву, гьаддиз гьюлин шид марцц хьуз хъубкьрадар.

Мидланра гъайри, гьюлин гъирагъдихъди вуйи шагьрарин ва районарин администрацйирин главйири, чпин администрацйиз дахил шулайи пляжарин зулариин тялукь нормативариъ улупнайи марццишнан ляхнар кIули гъахурадар. Мисалназ, гьюлин штун ва гъумран ери ахтармиш апIбан бадали вуйи лабораторияйин гюзчивал тешкил дапIнадар. Фуну йишвахь жикIуз ихтияр аш, фициб къайдайиинди ва фуну вахтна гьюлик дижикIну ккундуш, улупнадар. Гьацдар ва жара хайлин месэлйир арайиз дуфна.

Гьаддиз, гьюлик жи-кIуз ихтияр адрувализ лигну, Роспотребнадзори Мягьячгъала шагьрин пляжар дахил шулайи шагьрин айитI айи районарин администрац-йир пляжарин аьтрафариин «Гьюлик жикIуз ихтияр адар» кIуру рукьан ва гакIвлин тахт-йир керхбан гьякьнаан ва гьар сяаьтна зарбди улхру аппаратдиан пляждихъ хъайидариз мялумат дебккну ккунивалин гьякьнаан хабардар дапIна.