Цци, 6-пи июндиъ, ихь машгьур шаир, чIалнан устад ва бицIидарин дуст Гюлбика Уьмаровайин 60 йис тамам шула. Чан юбилейихьна шаири поэзияйин «Шюшесиб манзил» ччвур али поэзияйин китаб чапдиан адапIну.
Китабдиъ хайлин цIийи шиърар, бицIидариз вуйи эсерар, автори табасаран чIалназ таржума гъапIу вари дюн’яйин классикарин (А. Пушкиндин, М.Лермонтовдин, Л.Кэрроллин, О.Мандельштамдин, И.Бродскийин), хъа гьацира Расул Гьямзатовдин эсерар тувна.
Китабдиъ айи «Ургур чвуччвун ва сар чуччун гъала фикирнаъди» ччвур али пай Гюлбика Уьмаровайи машгьур табасаран авторарин (А. Жяфаровдин, Б. Митаровдин, И. Шагьмардановдин, З. Ханмягьмадовайин, М. Митаровдин, М.Шамхаловдин, Ш. Къазиевдин ва Ю. Базутаевдин) гьюрматназ бахш вуди дидикIнайи эсерарикан ибарат дубхьна.
Китабдиъ юкьуб поэма («ТIарам жигьилиз», «УьлчIюбгъю гуг», «Ургур чвуччвун гъала», «Шюшесиб манзил») табасаран чIалниинди ва саб урус чIалниинди (таржумачи – Арбен Къардаш) тувнайивал жаради къайд aпIyвал лазим ву. Муганаз Гюлбика Уьмаровайи асас вуди бицIидариз вуйи шиърар, ва бицIи кьадарнан жара эсерар дикIуйи. Юбилейихьна гьязур шули, дугъу сабсан хьуркьувал гъазанмиш гъапIну – чан яратмиш’валин рякъюъ сифте ражари вуди думу чIатху жюрейин эсерихьна – поэмайихьна илтIикIну.
Сифте гафнаъ автори чан поэмйирин асас мянайикан ва учв му жанрихьна илтIикIуваликан гьамци дибикIна: «ТIарам жигьилиз» эсериъ ихь жигьил ватанагьлийин ччвурнахъан, аьгъю шлубси, ачухъди дугъан ватандаш’валикан, дирбаш’валин рякъкан гъапунза; «УьчIюбгъю гуг» эсериъ ихь бабар фикирнаъди, гьарсар дишагьлийиин алахьурайикьан читинваларикан, янаки зурба халачийиан саб гуг уьчIюбгъган, фици рябкъюри шулдарш, гьаци уьмрариь аьсрар’инди зегьметну ккачIаркIнайи ихь шубарикан, дурарин аькьвликан, пис гьялнакан, кьимат тувуз удукьуридруваликан, бабахьна айи пучIу лигбакан ва, иллагьки дишагьли дирбашур гъахьиш, дугъахьна айи хаинваликан, жикъиди, хпи тяфайихъанди юкIв дурубграйивал, му эсер гъурхиган, гьисс aпIyз шулу; «Ургур чвуччвун гъала» эсериъ, ухьуз айикьан му тарихи гьядисайин мялуматар фикирнаъди, нивкIукдикьан гьич cap аькьюл айи чуччу чан гъахи чве масу тутруврувал, уз’ан удукьганси, гьисслу шикиллувалиинди улупунза; «Шюшесиб манзилиъ» узу ихь машгьур шаир-эскер Багьаудин Митаровдин эсерар ва сарпи шаир, мялим Зумруд Ханмягьмадовайин чан уьмрикан вуйи сюгьбатар фикирнаъди, гьамциб эсер бикIувал узина гъадабгъза ва дюрюбгъди имбу завун ранг али марцци шюшесиб гьисс бикIбиинди улупну, ихь чIалнан гъюдрачихъна – гагь гъюбчIвнайи дифраз ухшарди, гагь завунна убгъурайи мархьликан гъабши халачийин жил ккивру рачалси, гагь шиклик кайи уларин рангсузвалсина гюллйирин кумси, гагь уьмрин ва дявдин рюкъ-кумсиб кьисматнан айгьамар алахьурикан, язийин шюшесиб манзилиъ дюрюбгъю шюше гъахьиган… узуъ имбукьан дерднан дакьикьйири узухъди «УьчIюбгъю гуг» эсерра бикIуз гъитнушра, сабан чIивиди имбукьан гагьди гъамлувал гьисс гъапIу юкIв ккядядябхъюр…»
Улубкьурайи юбилейихъди тебрик апIури, Гюлбика Уьмаровайиз поэзияйин жилгъайиъ хъана цIийи хъуркьувалар ккун апIурача. Гъит, уву багъри литературайиъ гъибтрайи шил гележегдиъра шюшесиб марцциб ибшри.
