Улихьна йигъари узу Дербент шагьриъ дуланмиш шулай Аьлиеварин хизандихъди гюрюшмиш гъахьнийза. Рамазан Гьяжиибрагьимович ва ФатIимат Гьяжимирзаевна Аьлиеварин хизан ихь улькейиъ нумунлу, савадлу хизанси гьисаб шула.
Хизандин кIул Рамазан Гьяжиибрагьимовичди чан зегьметнан рякъ, Саратовдин мединститут кку-дубкIну, Дербент шагьрин Туберкулёздин больницайиъ ляхин апIуз хъюгъбалан ккебгъну, ва думу гъийин йигъазкьан гьадушваъ лихура. Туберкулёз гъагъи уьзурси гьисаб шула, гьаддиз дугъу, дидихъди аькси женг гъабхури, хайлин инсанар сагъ гъапIну. Фунуб ляхнихъ хъюгъишра, дугъу чаз табшурмиш дапIнайи ляхин намуслувалиинди кIулиз адабгъури шулу. Рамазан Аьлиевдин сихил духтраринуб ву, ва дурари гьарсари агьалйирин сагъламвал за апIбаъ лайикьлу йишв дибисна.
Ужуб, лайикьлу хизандин эйси хьувал гизафси уьмрин юлдшиканра асиллу ву.
Ухьуз абйирин гьамциб мисал айиб ву: «Ужуб хизандиъ бабкан хьувал, уьмриъ ужур юлдаш кьисмат хьувал – думу инсандин бахт ву». Мурари кьюридира чпи наан ляхин апIури гъахьишра, жямяаьтдин арайиъ ужуб ад ва лайикьлу гьюрмат гъазанмиш апIури, жямяаьтлугъдин уьмриъ заан активвал улупура.
Рамазан Гьяжиибрагьимо-вичдин уьмрин юлдаш ФатIимат Гьяжимирзоевна инсанарин арайиъ аьхю гьюрмат гъазанмиш дапIнайи дирбаш кас ву. Му касди чан уьмрин гизафсиб пай жигьил наслиз илим ва тербия тувбан гьюрматлу вазифайиз сарф гъапIну.
ФатIимат Аьлиева, Жвулли гъулан мектебдин миржиб класс ужудар аьгъювалариинди ккудукIну, Дербентдин педучилищейик урхуз кучIвру. Думу дурхну ккудубкIиган, Мягьячгъала шагьриъ ДГУ-йин урус чIалнанна литературайин факультетдик урхуз кучIвру. Табасаран райондиъ савадлу инсанар ва мялимвалин кадрйир лап цIибтIан адру ва дицисдар инсанариз аьхю игьтияж айи вахтна дугъу хайлин йисари багъри Жвулли гъулаъра, Дербент райиондин Чинар гъулаъра зегьмет гъизигну.
Арайиан гизаф йисар гъушну, вушра думу гъилиху гъуларин агьалйири дугъан гьюрмат, аьхю инсанвална заан къанажагълувал ва чпин веледарихъ гъизигу бегьерлу зегьмет гьеле гъира кIваълан гьаънадар. ФатIимат Аьлиевайи дарсар киву ва тербия туву гизаф жигьилари гьамусяаьт жямяаьтлугъдин арайиъ лайикьлу йишв дибисна, уьмрин жюрбежюр цирклариъ хъуркьувалиинди ляхин апIура. Дурари гьарсари гьюрматлу мялимдиз, тербиячийиз ва насигьятчийиз зурба чухсагъул кIура. Дурари гьеле гъира жюрбежюр месэлйириъ дугъкан гафнан ва насигьятнан кюмек ккун апIура. Жямяаьтлугъдин мянфяаьтлу ляхнар тамам апIуз чан вари къанажагълу уьмур сарф гъапIу гьюрматлу ва яшлу кас лайикьлу рягьятвализ – пенсияйиз удучIвну хайилин йисар ву. Амма дугъу уьлкейиъ инсаниятдин аку гележег вуйи, дурари апIурайи ляхнарин бина яратмиш апIбан вари халкьдин уьмуми ляхниъ чан зегьметнан лайикьлу аманат дивувал гьеле давам апIура.
Ухьу зиихъ къайд гъапI-ганси ичв хизан Дербент шагьриъ табасаранарин арайиъ нумунлу хизанси гьисаб шула, ва ухьуз рябкъюрайиганси, ичв хизан савадлу пишекрарикан ибарат дубхьнайиб ву. Му ярхи уьмриъ ужубра, харжибра гъябкъюнчвуз. Гъийин ихь гележегдин девир фици рябкъюрачвуз кIури гьерхган, Аьлиеварин хизандин кIулиъ айидари гьамциб жаваб тувнийи:
«Ав, ич уьмриъ учуз Ватандин Аьхю дявдин ва дидин кьяляхъ читин, гаш йисар ва жара читинвалар гъяркъюнчуз. Инсанди вари аьгь апIуру. Гъийин девир гъазанмиш апIру касдиз гизаф ужуб девир ву. Туканариъ, базрариъ фу ккундуш, гьадму булди дабхьна.
Сабсана месэлайи яшлуйирик гъалабулугъ’вал ктрипди гъибтрадар. Гъийин девриъ жигьиларин терефнаан яшлуйириз, кьабидариз гьюрмат апIувал зяиф дубхьна. Девлетну гъвалахъ хъайир рякъюз гъитрадар. Улихьдин вахтарин ужудар аьдатар кIваълан гьархра. Мисалназ, улихьди аба-баб, учвтIан аьхюр хьайишвахь ички убхъурдайи, папрус зигурдайи, лазимсуз гафар кIурдайи.
Гьамус дурар вари аьдати ляхнарси гьисаб апIура. Абйирин мисалиъ кIуруганси, гьюрмат адрушваъ берекетра даршул».
Мялум вуйиганси, аьхиримжи йисари ихь уьлкейиъ, республикайиъ хизанар даргъувалин дюшюшар кми-кмиди арайиз гъюра. Дурариз нумуна вуди гьамцдар хайлин йисари сатIиди яшамиш шулайи хизанар улупуз шулу. Гъит, ихь арайиъ мицисдар хизинар артухъ ишри. Дурар ихь гележегдин наслиз уьмрин дарсар ву.
