Улихьна йигъари кIули гъубшу РД-йин Халкьдин Собраниейин сессияйин дахилнаъди депутатари Дагъустан Республикайин аьтрафариин «Пишекарвалин гъазанждилан алдабгъру налог» – хусуси метлеб айи налогарин къайда дебккбан тереф уьбхюрайивал субут гъапIну. Улупнайи къанун июлин эвелариан кьувватнаъ ипди. Му месэлайин гьякьнаан РД-йин Халкьдин Собраниейин депутат Нариман Асваровди чан фикрар ачухъ гъапIну.

 

«Аьхиримжи сессияйиин депутатари кьабул гъапIу вари къанунар бицIи ва кьялан дилаварчйириз налогар тувбан рякъюъ рягьятвалар яратмиш апIбаз сарф дапIнайидар ву. Пишекарвалин гъазанждилан алдабгъру налогдикан гъапиш, му чпи ляхнихъди тямин апIурайи ватандашариз кайиб ву. Къанундин проектди ватандашариз дилаварчивалин ляхин рягьят шартIариъ гъабхуз ва жвуван гъазанжар къанундиз асас вуйидар апIуз мумкинвал тувди. Къанундиз асас вуди, сабпиб, налогдин ставкйир цIиб хьиди, кьюбпиб, душваъ Госуслуги порталиъ жарарин кюмек дарди гьисабнаъ учIвру, хъа гъазанждилан налог тувру мумкинвал адру йисан гьисабнаан удучIвру мумкинвал а. Текрар шулза, пишекарвалин гъазанждилан алдабгъру налог аьлава налог дар.

Дидин цIийиваларин бинайиинди йисандин муддатнаъ 2,4 миллионтIан артухъ пул оборотдиъ адру дилаварчйириз чпиин илирчнайи налогар цIиб апIру ихтиярар хьиди. Гьацира жвув ляхнихъди тямин апIурайи касар НДФЛ-диккан, НДС-диккан, сагъламвалин ва пенсйирин фондариз тувну ккуни страховой взносариккан азад апIиди.

Правительствойи му къанун дилаварчйириз кюмек вуди кьабул апIурайиб гьисаб апIура. Дидиъ халкьдин терефкраризра ужудар терефар гъяркъну», – гъапну Н.Асваровди.