Спортдин ММА-йин жюрйириан талитар гъахувал аьхиримжи вахтна вари дюн’яйиъ машгьур дубхьна. Урусатра кьяляхъ гъубзрадар. Хъа ихь уьлкейиъ спортдин мицдар кчIихбарин жюрйириин варитIан гизаф жигьилар маркьлу духьнайи республика, икибаштIан, Дагъустан ву кIури, саб шакра адарди пуз шулу. ММА-йин кчIихбарин жюрйирин талитариъ табасарандин хайлин баярра иштирак гъахьну ва шули а. Дурарикан сар Мартин Сефербегов ву.
– Мартин Сефербегов, Дагъустандиъ спортдин СБИ ММА-йин федерацияйин президентси, Табасаран райондиъ Гь.Гьямидовдин ччвурнахъ хъайи спортдин мектебдин директорра, ММА-йин спортдиан кчIихбариъ ужудар хъуркьувалар улупурайи спортсмен Аьсгьяб Сефербеговдин тренерра ву.
Гьаму йигъари Мартин Сефербегов чав тербияламиш апIурайи спортсмен Аьсгьябдихъди сатIиди багъри «Табасарандин нурар» газатдин редакцияйиз хялижвди гъафну. Учу дугъахъди жигьил спортсмендин гележегдикан, Табасаран райондиъ спортдихъди аьлакьалуди арайиз дуфнайи аьгьвалатнакан, ра- йондин спортсменарикан, дугъу ЧвулатI гъулаъ абццу спордин мектебдин месэлйирикан, ММА-йин спортдин жюрйириан республикайиъ гъахурайи талитарикан сюгьбат гъубхнийча.
Мартинди ктибтганси, ЧвулатI гъулаъ спортдин мектеб ачмиш дапIну, сад йис шула. Душваъ, гьадму гъуланси, багахь гъуларианра 45-тIан артухъ живанар ва жигьилар спортдиин машгъул ву. Мектеб райондин, республикайин балансдиз гъадабгъбахъди аьлакьалу месэла гьелелиг гьял дапIнадар. Хъа му зурба мектеб ялгъуз сар Мартиндин гъюнариин илипну гъитувалра дюз дар.
ЦIиб улихьнаси думу спортдин мектебдиъ ММА-йин жюрйириан спортдин кчIихбарин республикайин турнирра кIули гъубшну.
«Спортдиин машгъул вуйи баяр саб вахтнара чIуру ляхнар апIбан терефкрар шулдар. Узу жигьилариз дидин важиблуваликан ктибтураза. Гъи ич гъулан спортдин мектебдиъ тербияламиш шулайи жигьиларикан заан талитариъ анжагъ Аьсгьяб иштирак шула, хъа республикайин дережайин талитариъ иштирак духьну, хайлин баяри пешкешнан йишвар гъадагъну. Жигьилариз спортдиин машгъул хьуз, талитариъ, дурарихьна гьязур шлу серенжемариъ, спаррингариъ иштирак хьуз гизаф ккунду. Ухьу дурариз гьациб мумкинвал абгуз буржлу вухьа»,
– гъапну Мартин Сефербеговди.
Аьсгьяб Сефербегов цIиб улихьнаси Москва шагьрин кубок бадали вуйи ММА-йин чемпионатдиъ гъалиб гъахьну. Думу талитарин гъалибчйир Урусатдин чемпионатдиъ иштирак хьиди. Аьсгьябди мялум гъапIганси, думу талитариъ дугъаз финалин кчIихуб гъабхувал варитIан гъагъиди алабхъну. Финализ думу Мягъячгъалайин ЦIийи Хушет поселокдиан вуйи спортсмендихъди удучIвнийи. Аьсгьяб ММА-йиан чан гъагънан категорияйиъ 77 (кг) кьюб ражари Урусатдин чемпионра ву. Нубатнан ражари Урусатдин чемпионатдиз гьязур шула. Думу 6-пи майдиъ Москвайиъ кIули гъябгъиди.
Бажаранлу жигьил асас вуди Дербент шагьриъ чан тренер Мартин Сефербеговдин хиликк, «Скорпион» спортдин клубдиъ гьязур шула.
Спортдин думу клубдиан хайлин машгьур спортсменар удучIвну.
Мартинди 6 йис ва артухъ яш гъабхьи баяриз спортдин кчIихбариан аьгъювалар тувра. Дугъан гафариинди, багарихьди Буйнагъск шагьриъ ММА-йин жюрйириан Дагъустандин Кубок бадали вуйи талитар ва гьацира Табасаран райондин администрацияйин кюмекниинди Табасаран райондиъ Кьалухъ Мирзайин ччвурнахъ хъайи спорткомплексдиъ ММА-йиан республикайин турнир гъахувал планламиш дапIна.
Гъит, Мартин, яв кIваъ айи хиялар кIулиз удучIври. Урусатдин асас талитариъ Аьсгьябра гъалиб духьну, вари дюн’яйин чемпионатдихьна гьязур шлувалик, ихь райондин спортдин мектеб республикайин балансдиз гъадабгърувалик миж кивурхьа.
