Мартдин кьюбпи гьацIаъ Дагъустан Республикайин образованиейинна илимдин Министерствойи тешкил дапIнайи «Бабан чIалнаан варитIан ужур мялим – 2019» конкурс кIули гъубшну.

Шубуд йигъандин арайиъ вари республикайиан конкурсдиъ иштирак’вал гъапIу, бабан чIалар киврайи 40-тIан артухъ мялимди ачухъ дарсар гъахувалиинди, мастер-классар ва инновацйирин проектар улупувалиинди конкурсдин жюри чпин пишейиан чпиз айи аьгъюваларихъди ва гьязурлугъ’валихъди таниш гъапIну.

Конкурсдиъ иштирак гъахьи гьарсар мялимдин презентацияйиз жюрийи кьимат дивнийи. Натижайиъ сабпи йишв Гуниб райондиан вуйи, авар чIал киврайи Сапият Мягьямедовайиз, кьюбпи йишв – Каспийск шагьрин 3-пи нумрайин мектебдиъ табасаран чIал киврайи мялим Гюльмира Мамедовайиз, хъа шубубпи йишв Лак райондиан вуйи, лак чIал киврайи Асли Мягьямедовайиз тувну.

«Табасарандин нурар» газатдин терефнаан Гюльмира Ширинбеговна конкурсдиъ 2-пи йишван сагьиб гъахьивалихъди тебрик апIурача. Гъит, дугъаз чан пишекарвалин уьмриъ хъанара заан хъуркьувалар ишри.

Багарихьди Гюльмира Мамедовайиз «Табасарандин нурар» газатдин редакцияйиз дих дапIну, дугъахъди сюгьбат гъабхидича ва думу газатдин гъюру нумрарикан сабдиъ тувдича.