21-пи июнь – медицинайин гъуллугъчийин Йигъ ву. Медицинайин цирклиъ лихурайи вари гъуллугъчйир думу машкврихъди тебрик апIурача. Улихьнаси, медицинайин гъуллугъчйирин машкврин гъаншариъ, ляхниъ ужудар натижйир айи пишекрар улупуб ккун апIури, Табасаран ЦРБ-йин кIулин духтир Абсередин Мирзабеговдихьна илтIикIнийза. Дугъу саб жерге пишек-рар ктухнийи. Абсередин Исмяиловичди чпин вазифйирихьна намуслувалиинди янашмиш шлу пишекрарин арайиъ Сабир Аьзизовра улупнийи.
Сабир Аьзизов 1964-пи йисан Табасаран райондин Гурихъ гъулаъ бабкан гъахьну. 1980-пи йисан дугъу Хючнаарин кьялан мектеб ккудубкIну. 1983-1985-пи йисари Сабир Рашидовичди Советарин гьюкуматдин армияйин жергйириъ гъуллугъ апIури гъахьну, 1985-1991-пи йисари ДГМИ-йиъ сагъ апIбан факультетдиъ гъурхну, хъа 1991-1992-пи йисари дугъу Дербент шагьрин ЦГБ-йиъ интернатурайиъ анестозология-реаниматология кIуру йишваъ ляхин гъапIну. 1992 йислан 2016-пи йисазкьан Табасаран райондин ЦРБ-йиъ реанимацияйин отделиъ духтурди гъилихну. 2016-пи йисхъан мина гьадму отделениейин заведующийди лихура. Ав, гьелбетда, ухьуз мялум вуйиганси, аьзарлуйириз дивру диагноз духтри гъахру ахтармиш’валарикан асиллу шула. Гьаци вуйивализ лигну, пишекрар чпин ляхнихьна жавабдарвалиинди янашмиш хьуз мажбур шулу. Дугъу чаз айи вари аьгъювалар ляхниъ ишлетмиш апIура. Сабир Аьзизовдиз пишекарвалин машквар тебрик апIури, дугъаз ляхниъ заан хъуркьувалар ва жандин сагъ’вал ккун апIурхьа.
Лаура Аьлиева – 1966-пи йисан Табасаран райондин Хючна гъулаъ бабкан гъахьну. 1984-пи йисан дугъу Хючнаарин кьялан мектеб, хъа 1984-1990-пи йисари ДГМИ-йиъ сагъ апIбан факультет ккудукIну. Институт ккудубкIбалан кьяляхъ, 1990-1991-пи йисари Вологодский областдин больницайиъ терапияйин интернатурайиъ гъилихну. 1991-1998-пи йисари Лаура Гьяшимовна Табасаран райондин ЦРБ-йиъ участокдин терапевтди лихури гъахьну. 1998-пи йисхъан мина ультрозвуковой диагностикайин духтурди лихура.
Му касди швнуб-сабан Москва шагьриъ УЗД РАМАТО-йин кафедрйириъ чан пишекарвалин аьгъюваларин дережа за апIури гъахьну. 2009-пи йисан дугъаз заан категорияйин духтир кIуру чIвурра тувну. Хъа 2016-пи йисан Лаура Аьлиевайиз Дагъустан Республикайин «Сагъламвал уьбхбан отличник» кIуру лайикьлу чвурра тувну. Лаура Гьяшимовнайиз бицIидихъан мина духтирвалин пише кьабулди вуйи, ва думу гьаму пишейин эйсира гъахьну. Му касди ляхин апIурайи УЗД-аппаратдиан дилигну диврайи дагноздиканра инсанарин сагъламвал асиллу шула. Чан ляхин лап дикъатлуди апIурайивализ лигну, инсанар му духтрин ляхниинра лап разиди ву.
Чпин вазифйирихьна намуслувалиинди янашмиш шлу пишекрарин арайиъ «Медицинайин тяди кюмекнан» отделениейиъ ляхин апIурайи жигьил пишекрарра а. Коронавирусдин инфекцияйин уьзур удубчIвхъан мина 17-пи июндизкьан вуйи улупбариинди, «Медицинайин тяди кюмекнан» отделение-йиз 320 дих апIбар гъафну. Гьадму гьисабнаан 72 дих апIбар пневмония уьзриан кетIерццнайидарихьан, 20 дих апIбар цIийи коронавирусдин пневмонияйиан кетIерццнайи касарихьан вуйи. Больницайиъ ккаъдарин кьадар вари 61 кас ву, дурарикан пневмонияйин уьзриан кетIерццнайидар 50 кас, хъа коронавирусдиан кетIерццнайидар – 11 кас. Пневмонияйин уьзур кайидарикан чпин яш 18 йис дубхьну адрудар шубур ву. Хъа 19 йистIан артухъ яшнан кетIерццнайидарин кьадар 58 кас ву, дурарикан 47 кас пневмонияйиан, 11 кас – коронавирусдин уьзриан иццурайидар ву. 60 йистIан артухъ яш айи, кетIерццнайи жиларин кьадар вари 30 кас ву, гьадрарикан 21 кас пневмонияйиан ва 9 кас коронавирус уьзриан аьзарлу гъахьну. 55 йистIан артухъ яш айи, иццурайи дишагьлийирин кьадар 9 кас ву, гьадму гьисабнаан 7 кас пневмония ва 2 кас – коронавирусдин уьзриан кетIерццнайидар ву. Пневмонияйиан лап гъагъиди кетIерццнайи 3 кас жара йи-швариз гьаъну. 32 кас хулариъ гъитну, дурарикан 23 кас пневмонияйиан, хъа 9 кас коронавирусдиан кетIерццнайидар ву.
Гъийихдарин вари кьадар 11 кас ву, 8 кас пневмонияйиан ва 3 кас коронавирусдиан.
Чпин вазифйирихьна намуслувалиинди янашмиш шулайи пишекрар медицинайин гъуллугъчийин Йигъан лишанлу апIбан бадали, Табасаран райондин ЦРБ-йи РД-йин сагъламвал уьбхбан Министрествойиз кагъзар хъадаъна. «РД-йин сагъламвал уьбхбан отличник» ччвур тувбан бадали, министерствойиз эпидемиологияйин отделениейин заведующий Мягьямед Ханович Агъатаевдин, бицIидар хру отделениейин гинекологияйин акушер дишагьли Зульфия Аьлимурадовна Аьлимурадовайин документар хъадаъна.
Дагъустан Республикайин сагъламвал уьбхбан Министерствойин Гьюрматнан грамотйир тувуз райондин поликлиникайин участокдин педиатр Сабира Шамсудиновна Рягьимова, кардиологияйин духтур Мукаил Мягьямедович Аьб-дулов, инфекцияйин отделениейин медсестра Нарима Аслановна Уьсманова, хирургияйин отделениейин сестра-хозяйка Фируза Агъабеговна Рягьимова улупна.
Хъа Табасаран райондин главайин терефнаан пешкешар тувбан бадали, гьамцдар духт-рар улупна: Эсбет Вагъифовна Аьбдуллаева – духтир акушер-гинеколог, Лейла Усейхановна Абасова – райондин поликлиникайин участокдин духтир-терапевт, Нефизат Умалатовна Аьбдуллаева – КИЗ-дин медсестра, Шу-куфа Аьбдулмаликовна Мягьямедова – хирургияйин отделенияйин медсестра, Кумсият Аьбдулвагьабовна Байрамбегова – хирургияйин отделениейин санитарка.
Гьацира сасдар духтрарин ляхниканра дарпиди гъузуз шулдар. Духтир-реаниматолог Руслан Агъамов Табасаран райондин ЦРБ-йиан Мягьячгъалайиъ айи РЦКБ-йиз командировкайиз душна, коронавирусдин инфекция удубчIву йигъхъан мина гьадушваъ лихура.
Дагъустандин гьюкуматдин медицинайин университетдин студент риш Амина Аьлиева чан хушниинди Табасаран райондин ЦРБ-йиъ, коронавирусдин уьзриан кетIерццнайидар айи йишваъ провизорный отделениейиъ медсестради гъилихну. Му касариз халкьдин терефнаанра аьхю чухсагъул мялум апIура.
Табасаран райондин ЦРБ-йин отделенйири яваш-явашди чан улихьганси ляхин апIуз хъюгъра, кроватарра дивну, ккабалгура.
Духтирвалин ляхин ужуди аьгъю, чпин вазифйир намуслувалиинди кIулиз адагъурайи пишекрар айивали агьалйириз аьхю рягьятвал яратмиш апIура. Гъит, дицдар пишекрариз чпин читин ва жавабдар ляхниъ аьзарлуйирин гъуллугънаъ хьуз сагъ’вал туври.
