Жулжагъ гъулан бицIидарин «Шадвал» кIуру багъ ачмиш гъапIхъан мина, цци 10 йис шула. Му багъдин заведующий Гюльназ Гьясанаваевайи сабпи йигъарихъан мина дидиз регьбервал тувра. Дугъаз педагогвалин заан образование а, гьацира дугъу бицIидарин идарайиз регьбервал тувбан тялукь гьязурлугъ’валин курсарра ккудукIну. 2016-пи йисан райондиъ образованиейин идарйирин кIулиъ айидарин арайиъ «Образованиейиъ улихь хьайир» конкурсдиъ Гюльназ Гьясанаваевайи кьюбпи йишв гъадабгънийи.
Жулжагъ гъулан бицIидарин багъдиз, Жулжагъ гъул’анси, Кьулиф, Жул-жуниф, Уьгълигъ ва Ергюнигъ гъуларианра 75 бицIир гъюра. 2016-пи йисан душваъ кьюб, хъа гьамус – шубуб десте а. 2016-пи йисан «Шадвал» бицIидарин багъ дибдиан рас ва душваъ ужудар шартIар яратмиш гъапIну. Коллективдиъ лихурайи 25 касдикан 10 кас педагогвалин гъуллугъчйир ву.
– Ич метлеб – бицIидари йигъандин вахт фици-вушра адапIувал ваъ, хъа тялукь программйириз асас вуди, дурарихъди мянфяаьтлуди ляхин гъабхувал вуйич, – гъапнийи ич сюгьбатнаъ Гюльназ Гьясанаваевайи. Думу терефнаан учу ФГОС-дин программайин тIалабариинди лихурача, гъулан мектебдихъди аьлакьа уьбхюрача. Лазим вуйи жюрейин кюмекар, гьадму гьисабнаан методикайин, райондин образованиейин управлениейианра туврачуз. Хъа бицIидарихъди вуйи ляхнин хъуркьувалар, гьелбетда, дурарихъди ляхин гъабхурайи педагогвалин гъуллугъчйирин аьгъюваларикан, тажрубайикан асиллу ву. Хъа ич пишек-рар ужудар вуйич. Дурариз, тялукь пишекарвалин заан образованиеси, ужуб тажрубара а. Дидин гьякьнаан, месела, ич педагогвалин гъуллугъчйир райондин конкурсариъ иштирак шулайивали ва душвариъ ужудар натижйир улупурайивали кIура. 2018-пи йисан кIули гъубшу райондин «Йисандин тербиячи – 2018» конкурсдиъ ич бицIидарин багъдиъ лихурайи Пери Аьгьмедхановайи кьюбпи йишв гъадабгънийи. Дицисдар пишекрар учуз хъана ачуз. Месела, Саимат Агъагюлова, Пакизат Агъарягьимова, Зильфира Асланова, Беневше Аьгьмедова ва жарадар. Ич вари пишекрари ФГОС-диан чпин пишекарвалин дережа за апIбан тялукь курсарра ккудукIну.
БицIидарин багъдин дараматдиъ учIвиган, кIваз хуш шуйи. Душваъ, кьюрдун аьхълушнариз дилигди, маниди ва, жаради къайд апIуз ккундузузки, лап марцциди вуйи.
– Ич бицIидарин багъдиъ баяр-шубариз ужудар шартIар яратмиш дапIнайич. 2016-пи йисан, дибдиан рас апIбан кьяляхъ, багъ мебелихъди, оргтехникайихъди, рякъбан пособйирихъди ва жара лазим вуйи авадлугъарихъди райондин администрацияйи тямин гъапIнийи, – гъапнийи Гюльназ Гьясанаваевайи. – Думу ляхнар кIулиз адагъбаз ич бицIидарин абйир-бабари, гъуландари, ич коллективди райондин кIулиъ айидариз чухсагъул кIура.
БицIидарин багъдиъ бицIидари нивкI апIру, тамшир апIру ачухъ ва аку хулар, кухня, столовая – вари жа-жаради ву. Душваъ гьаммишан мани ва мичIли шид а.
– Марццишин, къайда уьрхюрча. Учухьна ихтибар дапIнайи уьмаратар учу дюрхнура ккунду, – аьлава гъапIнийи заведующийди.
Гьар йисан багъдиан сабпи классдиз 28-30 бицIир деетура, хъа дурарин йишв’ина хъана гьадмукьан бицIидар кьабул апIиди. Хъа бицIидарин багъдиз нубатнахъ дийигънайидарин кьадар аьхюб ву – 80-тIан артухъ.
Гележегдиъ Гюльназ Гьясанаваевайин планариъ мектебдин яшнакк ккуркьайиз вуйи бицIидарихъди вуйи ляхин вари терефариан лайикьлуди тамам апIувал а. Ниятар кIулиз удучIврияв, Гюльназ.
