Папрус зигували инсандин сагъламвализ туврайи зарарнакан аьгъдрур адаршул. Анжагъ, папрус зигувал дипуз читинди вузуз кIури, чиб чпи сагъламвалихъ мягьрум апIурайи касар цIиб адар. Дурарин арайиъ, папрус дизригрударихъди тевиш, саб гъурдларин рак кубчIврудар 10 ражари артухъ ву.
Папрус зигрударин арайиъ артмиш шулайи баяр-шубар дурарин жергйириъ адрахьбан бадали, ихь республикайиъ профилактикайин ляхин гъабхувал жанлу дапIна ва гьацира, жигьилари азад вахт мянасузди гьадрапIбан бадали, жюрбежюр уьлчмйир кьабул апIура. Дербент шагьриъ папрус зигувализ аьксиди гъабхурайи профилактикайин ляхникан, баяр-шубарин азад вахт тешкил апIбакан узу шагьриъ айи тамаши жюрейин пучIу атлетикайин ва спортдин ДЮСШ-дин пишекрарихъди сюгьбат гъубхунза.
Му тешкилатдин директор Нежеф Эмирбеговди гъапиганси, спортдиин аьшкьламиш духьнайи баяр-шубарихъди гьар вахтна профилактикайин ляхин гъабхури, тренировкйирин улихь, папрус зигували, наркотикар ишлетмиш апIували инсандин сагъламвализ тувру хатIалуваликанси, терроризмдин ва экстремизмдин гьяракатарин натижйириканра кIура.
«Ич мектебдиъ 482 бицIири тербия гъадабгъура. Дурарикан 62 шубар ву. Учу 5 йислан 18 йис’ина яш айи баяр-шубар кьабул апIурача. Дурарихъди 11 тренери ляхин гъабхура. Аьхиримжи йисари спортдихьна вуйи маракьлувал артухъ шула. Абйир-бабари чпин веледарин сагъламвализ фикир тувра. Гьацира эскервалин, спортдин ва хъана жара заан урхбан тешкилатарик урхуз кучIвруган, ГТО-йин натижйири 10 балл артухъ апIура»,
– кIура Нежеф Эмирбеговди.
«Шагьрин спортдин вари мектебариъ бицIидар пул дарди кьабул апIура. Учухьна фукьан бицIидар гъафиш, гьадмукьан кьабул апIурча. Аьхъю вахтна учу спортзалиъ, манишин айи вахтна стадиондиин шулча», – кIура футболин тренер Дагълар Шафиевди.
ЦIиб улихьнаси Мягьячгъалайин командайихъди вуйи футболин талитнаъ сабпи йишв гъибису баяр-шубарра гьаму тешкилатдиан ву. Команда талитнахьна гьязур гъапIу тренер Роберт Мягьямедов ву.
Нежеф Эмирбеговди чпин пишек-рарин, баяр-шубарин ва абйир-бабарин терефнаан шагьрин глава Хизри Абакаровдиз баяр-шубариз Мягьячгъала шагьриз экскурсия тешкил апIбаз аьхю чухсагъул мялум апIура.
«Думу экскурсияйин кьяляхъ баяр-шубарин спортдихьна вуйи маракьлувал гужал гъабхьну. Гьамусяаьт баяр-шубарин кьадар хъанара артухъ шулайич. Ихь агьалйирин спортдихьна вуйи маракьлувал йигълан-йигъаз за шула. Сагъди хьувал хайирлу ву», – давам гъапIну Нежеф Январовичди.
Дугъриданра, республикайин шагьрариъ, гъулариъ баяр-шубар спортдиин машгъул апIуз вари йишвариъ лазим вуйи шартIар ади гъахьиш, дурариз папрусарикан, наркотикарикан, къанунсуз гьяракатарикан фикрар апIуз вахт гъубзидар.
