Гьаму йигъари Табасаран райондиъ «ВаритIан ужур классдин руководитель – 2019» конкурсдин натижйир гъивну.
Конкурсдиъ иштирак хьуз райондин 15 мектебдиан заявкйир гъафнийи.

Сифтейин турариъ гьарсар мялимди, чпи гъабхурайи тербияйин ляхникан ктибтури, «Узу ва йиз класс» темайиан видиоролик улупну.

Финализ Хючнаарин 2-пи нумрайин мектебдин ва гьацира Ерси, ЧвулатI, Гурхун, ХустIил, Туруф, Пилигъ гъуларин мектебарин ва «Юлдаш» ЦО-йин мялимар удучIвну. Дурари финалиъ «Узу гьаз классдин руководителди лихура» темайиан вуйи презентацйир улупну.

Жюрийи сабпи йишв Туруф гъулан мектебдин мялим Лариса Аьлимягьямедовайин бажаранвализ тувнийи. Кьюбпи йишв Хючна гъулан 2-пи нумрайин СОШ-дин мялим Динара Гьюсейновайи гъадабгъну. Хъа шубубпи йишв Ерси гъулан мектебдин мялим Ханум Аьбдуллаевайи ва «Юлдаш» ЦО-йин мялим Марият Рамазановайи чпин арайиъ пай гъапIну.

Райондин УО-йин МКУ-йин начальникдин заместитель Ольга Красноже-новайи къайд гъапIганси, классдин руководитель – пишекарвал дар, му гьевескарвал, диагноз ва гьунарлувал ву. Жвув’ина кIул’инди вари классдин тербияйин ляхнин жавабдарвал гъадабгъувал гьии ляхин дар.