Пишейиинди дамагъ апIури

 

Гъи медицинайин цирклиъ лихурайи вакиларин ад вари дюн’я вуйибси тарабгъна, гьаци хьпаз хайлин себебар багьна гъахьну…

 

Медицинский сестрайин пише иццру касдихъан аьхю жавабдарвал, рягьим ва юкIв убгувал ккун апIурайи пишйирикан саб ву. Гьаддиз му уьмрин ляхин вуди ктабгъдарикан аьхириз дидиз вафалуди анжагъ инсандин сагъвалихъан бегьем юкIв убгурайидартIан гъузрадар.

Медсестрайин ляхин гизафдариз рягьтибси гьибгъру, фицики думу лизи марцци халат хъабхьну, шаду инчI кади сагъ шулайи аьзарлуйириз рубар йивуваликан ва градусник тувуваликан, ляхнин юлдшарихъди марцци кабинетдиъ чай убхъуваликан ва гь.ж. ляхнарикан ибарат шулу кIури, хиял ву. Хъа гьякьикьат жараб ву. Думу ляхнин гъагъи терефарикан, дикъатваликан ва жавабдарваликан РКБ-2 больницайин дахилнаъ айи 1-пи (Совминдин) поликлиникайин аьхюнур медсестра Анжела Аьбдулаевайи ктибтнийзуз.

«Ич ляхниъ чан хусусивалар гизаф а. Мисалназ, медицинский сестрайи апIру ужуб гафназ, дугъан теклифназ аьзарлуйири асас фикир тувру. Ич коллективдиъ аьхю тажруба айи пишекрар лихура. Дурари гьаму больницайиъ рягьимлувалин ужудар аьдатариз бин ккивна. Гьаддихъди сабси, гъи коллективдин 30% жигьилар ву. Жигьил медсестрйири аьхю яш айи юлдшарин тажруба ляхниъ гьисабназ гъадабгъури, деврин цIийи къайдйирра ишлетмиш апIура. Думу тажруба ва цIийи къайдйир сатIи дапIну лихувалин натижайиъ ухь’ин алабхъу коронавирусдин тIягъвниин гъалиб хьуз гъабхьну», – къайд гъапIнийи ич сюгьбатнаъ аьхюнур медсестрайи.

Анжела Аьбдулаева Хив райондин Гъвандикк гъул’ан ву. Багъри гъулаъ кьялан мектеб ккудубкIбан кьяляхъ думу Дербент шагьрин медицинайин училищейик урхуз ккучIвру. 1995-пи йисан училище кудубкIу Анжела шубуд йисан Гъвандикк гъулаъ медсестради гъилихнийи. Хъа уьмрин кьисматну думу Мягьячгъала шагьриз гъурхну. Гьадушваъ яшамиш шулайи Гъвандикк гъулан тухмарин вакил Расимдиз, гъулаз хялижвди гъафириз, жигьил медсестра кьабул гъахьнийи, ва бицIи вахтналан дурари сумчир дапIну, чпин хал-хизан ккебгъру. Мягьячгъалайиъ Анжела чан кIваъ айи пишекарвалихьан ярхла гъахьундар. Думу Республикайин медицинский центриъ, гьамус дидиз РКБ-2 ччвур тувна, ляхниъ учIвру. Анжела Мягьямедовна гьадушваъ 2004-пи йисхъан мина аьхюрнур медсестради лихура.

«Мартдин 16-пи йигълан мина ич поликлиникайиъ ва госпиталиъ ковид вирусдиан аьзарлу гъахьидар кьабул апIуз хъюгъну. Дагъустандиъ ковид кайивал ашкар гъабхьи сабпи дюшюшдин биоматериал РД-йин Халкьдин Собраниейин депутат Тимур Гусаевдихьан гъадабгъур узу вуйза. Думу дюшюшдин кьяляхъ ихь республикайин Главайилан гъадабгъну, кIулди дугъан администрацияйин ва вари депутатарин, министрарин, ковиддин вирус каш ахтармиш апIру, анализар гъадагъунза. Дурарин арайиъ саки 40-рихьна гьякимарик вирус кайивал ашкар гъабхьну. Гьякимарилан гъайри, поликлиникайи аьдати инсанарра кьабул апIура. Сад йигъан 50-тIан артухъ ватандашари чпин сагъвалин аьгьвалат аьгъю апIура.

Саб эргвал йивру йигъра адарди лихури шубубпи ваз вуйиз. Дюзди гъапиш, му вазар уьмурлугъ кIваълан дурушур. Уьру зонайиъ алабхьру, жвув вирусдихьан уьрхру палат лап гъулайсузуб ву, хъа машниин алабхьру пластмассиб маскайиан нефес хуз гъагъиди шулу. Гьадму палат алди асккан гьисаб йирхьуб сяаьтна гъузну ккунду, хъасин рягьятвал гъадабгъуз саб-кьюб сяаьт тувра. Гьамусяаьт госпиталиъ ковид кади 35 касдихьна аьзарлуйир ами. Сар кас сагъ апIуз шубуб гьяфта гъябгъюру. Лазим вуйи дармнар, алатар вари а. Сифте вахтари, яна апрелин вазли вирусдихьан уьрхру палтар, маскйир гьуркIри адайчуз. Мидланра гъайри, аьзарлуйирин анализарин жавабар вахтниинди дяргъюри гъахьну, фицики хайлин инсанар сабишв’инди иццру гъахьнийи. Гьадмуган анализар гъадагъуз хътруркьри, я гъадагъуз йишвариина гъягъюз мумкинвал дибрихъри гъабхьнийчуз. Москвайиан гъафи духтрарин кюмек аьхюб гъабхьну.

Сабпи йигъари инсанар уьзур айивалихъ, думу республикайиъра тарабгъбан аьхю хатIа айивалихъ затра хъугъри адайи. Агьалйири гьюкмин, уьлкейин кIулиъ айидарин хулариъ гъузуз теклиф апIбан гафар, духтрарин терефнаан марццишин уьбхбан насигьятар гьисабназ гъадагъури гъахьундар. Сар-сарихьна гъягъювалин, иццру гъахьириин улукьури хьувалин, марццишин дюрюбхрувалин натижайиъ республикайин аьхю пай агьалйир саб йишв’инди аьзарлу гъахьну. Гьаддиз духтрариз гъагъиди алабхъну. Гъи ихь арайиъ тарабгъурайи вирус беден зяиф апIруб, гъагъи иццрушнар арайиз хруб ву. Думу ктрубчIвбан бадали гьапIну ккундуш, духтрари гизаф теклифар тувра. Гьадрар фикриз гъадагъну ккунду», – гъапну Анжела Аьбдулаевайи.

Чан пишейикан улхури, дугъу гьеле бицIивахтнахъан мина медсестра хьуз кьаст гъапIуваликан ктибтнийи.

«Узуз йиз пише лап ккундузуз ва дид’инди дамагъ апIураза. Гьаму йигъари ихь уьлкейиъ медицинайин цирклиъ лихурайидарин Йигъ къайд гъапIнийи. Узу йиз ляхнин юлдшар, медицинайин цирклиъ лихурайи вари ватандашар пишекарвалин машкврихъди тебрик апIураза ва дурарикан ляхниз вафалуди гъузуб, дид’инди дамагълу хьуб ккун апIураза. Гьаму аьхиримжи вазари наънан-вуш саб дупну аьхю лепеси Дагъустандиина тарабгъу уьзри хайлин аьдати инсанарси ич ляхнин юлдшарра уьмриан гъурхну. Учу дурар сарра кIваълан гьархударча. Гъит, дурарин аьхиратдин хал ужуб ибшри. Хъа гьамусяаьт йиз гъвалахъ хъайи ва йиз сес ебхьру медсестрйириз гьамци пуз ккундузуз. Гъи духтрарин ва медсестрйирин ад вари дюн’яйиъ за гъабхьну. Ич больницайиз ва поликлиникайиз сикин дарди пациентарихьан чухсагъулин кагъзар гъюра. Ватандашарин улихь гележегдиъра баркаллагь гъадабгъруси, жвуван ватан ва халкьдин сагъвал бадали зегьмет зигурхьа. Ихь арайиан гъушу чйири ухьуз ад гъазанмиш гъапIну. Думу шаклувалик ккипуз ккунидариз ихь жергйириъ йишв бихъидар», – аьлава гъапIну Анжела Аьбдулаевайи.

Гъит дугъан гафар варидариз ерхьри.