Гьаму йигъари Хив райондин администрацияйиъ гьар йисан хьадукра къайд апIру «Эбелцан» машкврихьна гьязур хьпан месэлйириз бахш дапIнайи совещание кIули гъубшну.

Къайд апIуз ккундучуз, райондин бязи гъулариъ му кюгьне машквар март вазлин 2-пи султ йигъан (цци 9-пи мартдиъ), хъа райцентриъ март вазлин 3-пи султ йигъан къайд апIури шулу. Дагъустандин гьарсаб халкьди му машквриз хусуси ччвур тувна: табасаранари – «Эбелцан», лезгйири – «Яран сувар», азербайжнари – «Навруз». Амма гьарсаб халкьди му машквар хьадукар гъафивалихъди ва бистнар – багъарин ляхнар ккергъуз вахт улубкьувалихъди аьлакьалу апIура.
Гьаму йисан райондиъ Эбелцан мартдин 16-пи йигъан къайд апIиди.

Вахтназ вуди райондин главайин вазифйир тамам апIурайи Агъамирзе Гьямзабеговди къайд гъапIганси, машкврин программайиъ яркьу концертра улупиди. Душваъ райондин дережайин артистарилан ва самодеятельностдин коллективарилан гъайри, табасаран ва лезги эстрадайин машгьур артистарра иштирак хьиди. Райондин жигьилариз спортдин жюрбежюр жюрйириъ чпин удукьувалар улупузра мумкинвал хьибди.