Жиниб дар, ХХI аьсриъ агьалйирин яшайишдин артмиш’вализ манигъ’вал апIурайи саб жерге учIру месэлйирин арайиъ наркоманияйин ва алкоголизмдин месэлйири лайикьлу йишв дибисна. Му зегьери Хив райондиъра инсанарин, асас вуди жигьиларин, сагъламвал зяиф апIбаз, думу «уьзур» себеб вуди хизанар даргъбахъди сабси, тахсиркарваларин кьадар артухъ хьпазра рякъяр яркьу апIура.
Хив райондин айтIан ляхнариз лигру отделин гъуллугъчйири, тахсиркарвалар кам апIбан, Дагъустандиъ наркоманияйиз аькси женг гъахбан метлебниинди кьабул апIурайи уьлчмйириз асас вуди, йишвариин кьатI’и серенжемар гъахура.
Гьаци, Хив ОМВД-йин УР-дин НОН-дин жавабдар гъуллугъчи Аьлипулат Хидировди къайд гъапIганси, цци 11-пи мартдилан 22-пи мартдизкьан Урусатдиъ мялум дапIнайи «Аьжал масу туврайи йишвкан хабар тув» агбанна гъаврикк ккаъбан акцияйин 1-пи этапдин дахилнаъди Хив ОМВД-йин гъуллугъчйири саб жерге жара жавабдар гъуллугъарихъди сатIиди, мектебариъ урхурайи живанарахъди гъаврикк ккаъбан гюрюшар гъахбан, йишвариин къанунсузди битмиш апIурайи наркотик кайи саб жерге набататар дурзнайи йишвар ашкар ва терг апIбан, му зегьер тарабгъбиин машгъул вуйи касар мялум дапIну, дурар жавабдарвалихьна зигбан, наркотикар тарагъбаз рякъяр хъяркьбан тялукь серенжемар гъахувал гьяракатнаъ ипна.
Живанарихъди тешкил апIурайи гюрюшариъ къанун уьбхру гъуллугъчйири наркоманияйин хатIалуваликан, папрус зигували инсандиз туврайи зарарнакан ва жара мяналу сюгьбатар гъахура, жюрбежюр презентацйир, слайдар, видеороликар улупура.
– Аьхиримжи йисари гьюкмин органари жигьиларин месэлйириз, дурарин игьтияжариз артухъ фикир тувуз хъюгъна. Тялукь янашмиш’вал деврин гъизгъинвалари тIалаб апIура. МВД-йин табшуругъариз асас вуди Урусатдин аьтрафариин гъахурайи серенжемарин дахилнаъди учура, мартдин 11-дилан башламиш дапIну, райондин аьтрафариин тялукь ляхин жанлу дапIнача.
Улупнайи гюрюшар гъахбан бадали, мялимарна духтрарра жалб дапIну, тялукь дестйир тешкил дапIна. Му ляхнихьна гьарсар ватандаш жавабдарвалиинди янашмиш хьпаъ аьхю мяна а. Фицики, наркотикарин асиллувалиъ ахъу живанарин гележег фициб шулаш, гъи сар касдизра жиниб дар, – аьлава гъапIну Аь. Хидировди.
