Мартдин 13-пи йигъан Дагъустан Республикайин Правительствойин Председатель Артем Здунов зегьметнан ва региондин яшайишдин артмиш’валин Министерствойин коллегияйин яркьу заседаниейиъ иштирак гъахьну. Заседаниейиъ РД-йин зегьметнан, ляхнихъди тямин апIбан ва агьалйирин яшайишдин тереф уьбхбан 2018-пи йисандин натижйир ва 2019-пи йисаз улихь дивнайи месэлйир гьял гъапIнийи.
Серенжемдиъ асас доклад хьади РД-йин зегьметнан ва яшайишдин артмиш’валин министр Изумруд Мюгьюдинова удучIвну гъулхнийи. Дугъу чан докладдиъ «Ватандашарин яшайишдин тереф уьбхбан» гьюкуматдин программайин дахилнаъди ватандашарин бязи гъатариз ва хизанариз кюмек тувбан серенжемар вахтниинди гъахбаз асас фикир туврайиваликан къайд гъапIнийи.
«Яшайишдин игьтияжар гьуркIбан бязи центрари чпин ляхниъ цIийивалар тIаъра, цIийи жюрейиинди ляхин апIуз хъюгъна: «Социалин такси», «Гъагъи аьзарлуйириз хъайивал апIбан гъуллугъ», «Хулан айитI санаторий», «Гьарсар инсан кьабул апIру хизан» ва гьацдар жара гъуллугъар ачмиш дапIна.
Агьалйир ляхнихъди тямин апIбан бадали, пенсияйин вахт багахь шулайи 798 ватандашдиз пишекарвалин аьгъювалар тувбан ляхин тешкил дапIну ккунду. Гъийин йигъаз пенсияйин вахт багахь шулайи 140 ватандашдиз пишекарвалин аьгъювалар тувбан гьякьнаан ляхин туврударихъди йикьрар дапIна. Гьюкуматди ва бизнесди уртахъди ляхин апIбан дахилнаъди, рягьимлувалин фондар ва жямяаьтлугъ тешкилатар жалб апIури, министерствойи пенсионерариз азад вахт адапIру центрар ачмиш апIувал планламиш дапIна. Думу центрариъ, аьхю яшнан инсанари чпин яшайишдин месэлйир гьял апIувалси, игьтияж айидариз кюмек тувбан ужагъра хьибди», – гъапну Изумруд Мюгьюдиновайи.
Коллегияйиъ натижйир йивури, Артем Здуновди къайд гъапIганси, гьаму йисаз Дагъустандин улихь дийибгънайи месэла «Демография» милли проектдиъ иштирак хьувал ву. «Гьюкуматдин программйириинди ухьу жалб апIурайи пулин дакьатар тамамди республикайиз хъуркьруганси дапIну ккунду».
А.Здуновдин гафариинди, гизаф бицIидар айи хизанар гьюкуматдин терефнаан кюмекназ ккилигура. Гьаддиз лигну, РД-йиъ айи зегьметнан ва яшайишдин артмиш’валин Министерствойиз чаина гъадагънайи яшайишдин мажбурнамйир тамам апIбаз – маважиб за апIбаз, бицIидар айи хизанариз вахтниинди гьюкуматдин пособйир тувбаз дикъатлу фикир тувувал табшурмиш гъапIну.
Мидланра савайи, РД-йин премьер-министри шубурпи бицIир бабкан хьувалин гьякьнаан вуйи программайик республикара кубчIвбан пландикан гъапнийи.
«Игьтияж айи гьарсаб хизандихьна дуркьну ккунду. Касибвалихъди женг гъабхувал саб субсидйир ва пособйир тувбиинди ккудубкIурадар, лихру йишвар ачмиш дапIну ккунду, гьадму гьисабнаъди сакьатдаризра, яшлуйиризра»,
– мялум гъапIну дугъу.
