Гьарсаб теракт – аьхю мусибат ву. Диди инсанарин уьмрар гъахуру, дурар йитим апIуру, ккудудукIру дердар, хажалатар хуру. Дюн’яйин фунуб уьлкейиъ теракт гъабхьишра, диди йиз кIваз гизаф гъагъи тясир апIуру.

Магьа гъи, 15-пи мартдиъ, ЦIийи Зеландияйин кьюб мистаъ гъагъи терактар гъахьну. Аллагь кIул’ин алдру сар вягьшийи чан унтIаъ видеокамера ибтIну, чав апIурайи «гьунар» видеойиз адабгъури, мистаз гъудган апIуз дуфнайи мусурмнариз автоматдиан йивуз хъюгъну. Натижайиъ дугъу 49 кас йивну гъийихну, 48 касдиз жюрбежюр гъагъишнан зийнар гъапIну.

ЦIийи Зеландияйиъ мицисдар терактар зат гъахьидар дар. Инсанариз лап гучI гъабхьну. Уьлкейин премьер-министри агьалйирикан, иллагьки мусурмнарикан, хул’ан удудучIвувал ккун гъапIну. Швнуб-саб сяаьтнан арайиъ мектебар ва жямяаьтлугъ жара идарйир хъяркьну гъахьну.

Полицияйин улупбариинди, теракт кIулиз адабгъдар шубур кас ву. Дурарикан сар – Брентон Таррант – Австралияйиан вуйи, 28 йисаъ айи жигьил ву.
Чан «гьунар» кIулиз адабгъайиз, дугъу интернетдиъ теракт апIбан себебарикан гъибикIну. Душваъ Таррантди жара йишвариан удучIвну гъафи инсанарихьна вуйи чан даккнишнакан гъапну ва террориствалин алжагъувал апIуз гаф тувну.

Гизаф фикрар апIури шулза, инсан йивну йикIуз кьаст дапIну, хилиз яракь гъадабгъру касдин кIулиъ фициб фикир ади шуйкIан?

Ясана думу касдин кIулиъ Первердигари фикир зат ивундайкIан?

Дицир кас дюн’яйиз бабу гъахир дайкIан?

Мистаъ айи ислягь агьалйир гьаз йивну йихуру?

Эгер сар касдикан, тмунурикан увуз хъял каш, дурарихъди жаради месэла гьял апIин. Хъа гьаму кьадар инсанар фу бадали уьмрихъ мягьрум апIурава?

Му дюн’яйиъ вари инсанар уьмур бадали Аллагьди халкь гъапIдар ву. Дурарин уьмур гъадабгъуз Аллагьу ТяаьлайизтIан ихтияр адар. Дарш террористари чпи заваринна жиларин аьхюдарси гьисаб апIурайин?

Гьадраринра йигъ гъибди.

Фу пузахъа? Дицисдар касар я му дюн’яйиъра, я тму дюн’яйиъра саризра лазим дар.