Дагъустандин яркврариъ цIа кабхъбан заан IV-V классдин дережайин хатIа айивализ лигну, РД-йин Правительствойи 2020-пи йисан 9-пи июлихъан Дагъустан Республикайин аьтрафариин ерлешмиш духьнайи яркврар цIа кабхъбан хатIалувалихьан уьрхру кIул’инди вуйи къарар кьабул гъапIну.

 

ЦIийиди кьабул гъапIу къарариин ва РФ-дин Ярквран кодексдин тялукь пунктариин биналамиш духьну, 9-пи июлихъан 30-пи июлизкьан Дагъустандиъ яркврариз гъягъюз, ярквраъ жюрбежюр ляхнар гъахуз ва душвариз машинар хъауз гъадагъа дапIна.

Гьамусяаьт республикайин яркврариъ къанунар уьбхру органарин вакиларин кюмекниинди гюзчивал гъабхувал гужал дапIна. Ярквраризди гъягъру рякъяриин шлагбаумар дивна, ярквраъ учIвру ва цIа кабхъбан аьхю хатIа айи йишварихь гъаравлар дерккна. Яркврарин сяргьятарин багарихь ерлешмиш духьнайи хусуси жилариин, хутIлариъ, багълариъ дурарин эйсйири гъахурайи ляхнар мюгькамди гюзчиваликк уьрхюра. Гъеерццу цIирцIарик, зир-зибилик цIа кипиш, ярквраъ ва дидин багарихь цIа алапIиш, тахсиркрар административ жавабдарвалихъна хуру.

Зиихъ улупнайи тахсиркарвалар арайиз гъахи ва къарар чIур гъапIу физический касари – 5 агъзурихьна, хъа юридический касари – 500 агъзурихьна журум тувди.
РД-йин ярквран мяишатдин Комитетди республикайин ватандашариз яркврариъ цIа кабхъбан хатIа имиди яркврариз дурушбан теклиф апIура.