Улихьнаси Дагъустандин Огни шагьриъ саб чIуру гьядиса гъабхьну.

 

КIваин апIураза, 5-пи июлиъ Дагъустандин Огни шагьриъ, гвачIниндин вахтна токдин симарин замыкание дубхьну, «Источник» магазиндик цIа кабхъну ва дидин айитI айи вари шей’ар гъургну. Мициб бедбахтвал гъабхьи магазиндин эйсийиз кюмек вуди, шагьристанари пул уч апIуз мясляаьт гъапIну. Сарпидарин цIарнаъди зарар гъабхьи касдиз пулин кюмек шагьрин мэрин вазифйир тамам апIурайи Жалалудин Аьлирзаевди гъапIну. Кьюд йигъандин арайиъ магазиндин эйсийин банкдин картайихъна 500 агъзуртIан артухъ пул уч гъабхьну.

Мидкан хабар гъабхьи му шагьрин 16 йис дубхьнайи агьалийи магазиндин эйсийиз телефондин WhatsApp-диз «Кюмек апIуз ккундузуз. Картайин нумра хъадапI» кIури, гъибикIну. Аьгьвалатнан гъавриъ адру эйсийи мугъахьна чан картайин нумра хътапIуру. ЦIиб вахтналан му хаин касди эйсийихьан телефондиз гъафи парольра чахьна хътапIуб ккун апIуру. ИкибаштIан, магазиндин эйсийи думура хътапIуру. Бедбахтвал кIул’ина дуфнайи магазиндин эйсийиз саб герендилан чан картайихъна кюмек вуди дуфнайи вари 511 агъзур манат хътабгъуваликан хабар шулу. Дугъу, полицияйиз душну, аьрза бикIуру.

Дагъ. Огни шагьрин полицияйин гъуллугъчйири пул икI гъапIу живан фуж вуш дишлади аьгъю гъапIну ва гъидисну. Дугъу чав гъапIу абурсуз ляхин кIул’ина гъадабгъну.

Му тахсиркарвалин гьядисайин гьякьнаан материал уч дапIну, полицияйин вакилари РД-йиъ айи Урусатдин Федерацияйин Силисчивалин комитетдин силисчивалин управлениейиз хъадапIна.