Дюн’яйин хатIасузвалин аьгьвалатназ фикир тувиган, гьякьикьатдиъ арайиз гъюрайи асас пай тахсиркарвалар агьалйири къанунсузди ва тялукь ихтиярарин бинайиинди яракь ишлетмиш апIувалихъди ттархьну гъюра. Му дюшюшар, жиниб дар, ихь республикайин аьтрафариинра яркьуди тарагъна.

Аьгьвалат фикирназ гъадабгъну, вари Дагъустандиъси, Хив райондин аьтрафариинра айтIан ляхнарин гъуллугъчйири, 2019-пи йисан эвелариан башламиш дапIну, ватандашарихъди дурари къанунсузди уьбхюрайи яракь, тIуркIру сяняаьтар чпин хушниинди тувбаан метлеблу ляхин жанлу дапIна.

Хив РОВД-йин начальник, полицияйин подполковник Кехлер Рамазановди къайд гъапIганси, жвуван хушниинди яракь тувруган, гьарсаб яракьдихъан тяйин дапIнайи кьадарнаъди гьякъира тувра. Урусатдин УК-йин тIалабариз асас вуди, къанунсузди яракь, тIуркIру сяняаьтар масу гъадагъбаз, алвер апIбаз, уьрхбаз, саб йишвлан жара йишв’ина гъахувализ тялукь жавабдарвал улупна. Му гьяракатарикан фунуб-вушра арайиз хуз гьязур вуйи тахсиркрари къанунарин бинайиинди жаза зигиди.

Кехлер Рамазановди субут гъапIганси, къанунсузди яракь уьбхбан жазайихьан думу яракь хушниинди тувували азад апIура. Мидланра савайи, тялукь ихтияр ади масу гъадабгъу яракьдин регистрация апIру вахт улдубчIвнаш, дидин эйсийи административ жавабдарвал гъабхуру. Гьаддиз му ихтиярар цIийи алаъну ккунду.

Дупну ккунду, къанунсузди яракь гьязур апIувал, цIайлапан яракь рас апIувал, тIуркIру сяняаьтар гьязур апIувал гъагъи жюрейин тахсиркарваларик кахьра. Агьалйирихьан яракь йисан аьхиризкьан кьабул апIиди.

Улупнайи вари серенжемар, гьюрматлу ватанагьлийир, ихь наслариз ислягь гележег яратмиш апIбан, уьлкейиъ саламатвал уьбхбан гъаразнаъ ади кьабул апIурайидар ву.

Гьякьикьатдиъ алахьурайи чиркинваларихьна, тахсиркарваларихьна вижнасузди янашмиш махьанай! Къанунсузди уьбхюрайи яракь ва аьлава тIуркIру сяняаьтар, лазим саягъниинди дуфну, полицияйин гъуллугъчйирихьна тувай. Тялукь гьяракатарин натижайиъ учвуз къанундиъ улупнайи гьякъира тувди. Учвуз, ичв хизанариз архаин яшайиш ккабалгбан гъайгъушнаъ йихьай!