Аьхиримжи вахтна Ютубдиъ Табасаран райондин жюрбежюр гъуларин тарихдикан, халкьдин сяняаьткарваларикан, культурайин артмиш’валикан ктибтурайи швнуб-саб документальный фильмдихъди таниш хьуз шулу. Дурарин автор Табасаран райондин Кувагъ гъулан агьали Иса Аьбдурягьманов ву.

«Ихь багъри районарин гъуларикан, сяняаьткарваларикан, аьдатарикан, тарихдикан, машгьур инсанарикан фильмар гьязур апIуз ухдихъан мина ниятар айзуз. Амма дурар уьмриз кечирмиш апIуз мумкинвал адайзуз. Йиз метлебарикан Урусатдин гъуларин жигьиларин Союздин председатель Мягьямед Гьясратялиевдиз ктибтнийза. Дугъан ва «Фокус» студияйин кIулиъ айи Назир Вердиевдин кюмекниинди йиз планар кIулиз адагъуз хъюгъюнза»,

– ктибтура Иса Аьбдурягьмановди.

Гъийин йигъаз Табасаран райондин Жвулли, Хюрикк, ЧIвурдаф, Шилла, ХустIил гъуларикан вуйи документальный фильмариз Ютубдин «Тут Табасаран» каналиъ лигуз шулу.

Иса гьамусяаьт табасаранарин сумчрарин аьдатарикан, табиаьтдин ядиграрикан ва гь.ж. документальный фильмар адагъбан проектариин лихура. Гележегдиъ ухьу дурарихъдира таниш хьиди кIури, миж кивдихьа.