Улихьна йигъари Москва шагьриъ «Йиз юрднан ерли самоуправлениейин тарих» вари Урусатдин конкурсдин сабпи ва кьюбпи турарин натижйир йивбиинди финализ конкурсдин 357 иштиракчйир гъядягъну. Гьадрарин дахилнаъ Дагъустандиан вуйи 6 иштиракчйирикан сар – Табасаран райондин Хючна гъулан ЦО «Юлдаш» МКОУ-йин выпускник Камил Гьяжиев ву.

 

 

Пуб лазим вуки, ерли самоуправлениейин месэлйириз лигурайи Госдумайин комитетди, РФ-дин мярифатнан Министерствойи ва конкурсдин имбуну тешкилатчйири му конкурс 12 йислан 25-йис’ина яшар вуйи жигьиларин арайиъ, жвуван юрднахьна, культурайихьна, тарихдихьна гьюрмат убхювалин метлеб ади, тешкил гъапIуб ву.

Конкурсдиъ иштирак хьуз швнуб-саб номинацйир улупнайи. Камил Гьяжиев чан тарихдин дарснан мялим Мадина Сейидовайин хиликкди «Ерли самоуправлениейин тарихнаан сад йигъ» номинацияйиан гьязур гъахьнийи ва конкурсдиъ, 20 йис улихьна Дагъустан бадали сатIи духьну, республикайин вари миллетарин вакилари Хаттабдин ва Басаевдин кьушмарихъди гъубху женгнакан ктибтурайи видеоролик гьязур гъапIнийи. Гьадму вахтнан гьядисйир фици гъягъюри гъахьнуш, дагъус-тан халкьари БотIлих райондин агьалйириз фици кюмек гъапIнуш тясир апIруси, гьисслуди Камили ктибтувал жюрийиз лап кьабул гъабхьну.

 

Конкурсдин финалин серенжемар сентябрин вазли Москвайиъ РАНХиГС-дин ва Госдумайин залариъ очно къайдайиинди гъягъиди. БицIи яшарин гъалибчйир вари халкьарин бицIидарин центр «Артекдиз» гьаъди, хъа аьхю яшарин гъалибчйириз Госдумайиъ практика гъабхуз теклиф апIиди.

Ихь жигьил ватанагьли – Камил Гьяжиев финализ удучIвбахъди тебрик апIурача ва думу гъалиб хьпакра умуд киврача.