Январин 25-пи йигъан Табасаран райондин депутатарин Собраниейин XV сессияйиъ Табасаран райондин главади Дагъустан Республикайин Халкьдин Собраниейин депутат Мягьямед Сиражудинович Къурбанов ктагъну.
Табасаран райондин депутатарин Собраниейин сессияйиъ иштирак гъахьи 42 депутатдикан 41 касди чпин сесер Мягьямед Къурбановдихъанди тувну.
Месела сессияйиз адабгъайиз, райондин главайин гъуллугъниина вуйи кандидатарин арайиъ конкурс кIули гъубшнийи. Конкурсдин аьхиримжи пайнаъ Арсен Мирзабалаев, Аьлимягьямед Къазиев, Мягьямед Къурбанов ва Аьликерим Эскеров иштирак гъахьнийи.
Сюгьбат гъабхбан жюрейиинди гъубшу конкурсдин 2-пи пайнан аьхириъ конкурсдин комиссияйин председатель Аьли Ибрагьимовди Табасаран райондин депутатарин Собраниейиз протокол хътапIну. Конкурсдин 2-пи пайнан натижйириз лигну, комиссияйи муниципалитетдин главайин гъуллугъниина вуйи конкурсдиъ хъуркьувалар улупу Аьлимягьямед Къазиевдин ва Мягьямед Къурбановдин кандидатурйир улупну. Райондин депутатарин Собраниейин заседаниейиъ му кандидатар Табасаран район артмиш апIбан гьякьнаан хусуси программа хьади удучIвну гъулхну, хъасин дурари уч духьнайидарин суалариз жавабар тувну.
Натижайиъ райондин Собраниейин депутари ачухъ вуди сесер тувбиинди 5 йисаз муниципалитетдин главади Мягьямед Къурбанов ктагъну.
ЦIийиди кадагънайи главайин улихь зурба месэлйир дийигъна. Хъа ихь варидарин метлеб саб вуйихь – багъри ватан уткан апIувал, агьалйириз яшайишдин гъулай шартIар яратмиш апIувал. ЦIийиди кадагънайи главайи чахъанди сесер тувдарин, багъри райондин агьалйирин мурад-метлебар тамам апIур кIури, умуд кивдихьа.
Гьюрматлу Мягьямед Сиражудинович!
«Табасарандин нурар» газатдин редакцияйин коллективди, уву «Табасаран район» муниципалин райондин главади ктагъувалихъди тебрик апIури, увуз мюгькам сагъ’вал, райондин вари циркларихъди ва гъуллугъарихъди, хъа асас вуди райондин аьдати агьалйирихъди сигъ аьлакьа уьбхюри баркаллу зегьмет зигуз мумкинвал хьуб ккун апIурача. Гъит, багъри Табасаран артмиш апIбаъ уву яв кIваъ уьрхюрайи фикрар, хиялар, умудар кIулиз удучIври!
