Августдин 4-пи йигъан Ливандин меркез Бейрутдиъ гизаф хатIалу тIубкIувалин дюшюш гъабхьну. Натижайиъ асккан гьисаб 135 кас уьмрихъ мягьрум гъахьну, гъийихдарин кьадар гьеле бегьемди мялум дубхьнадар, думу йигълан-йигъаз артухъ шула. Зарар гъабхьидарин ва зийнар гъахьи инсанарин кьадар 5 агъзуртIан артухъ ву. Шагьрин гьюкмин кIулиъ айидари тIубкIувалин кьувватнан сес Хиросимайиъ ва Нагасакийиъ ядерный бомба тIубкIувалин сеснахъди тевну.
ТIубкIувалин сес варжариинди километрйирин манзилнаъ, Кипрдиъра кмиди гъеебхьну. Гъабхьи дюшюшдин асас себебарикан саб – гизаф йисари лазим вуйиси уьбхюри адру тIубкIру сяняаьт гьясил апIру ва ракетйириз убгруб гьязур апIру гъулан мяишатдин удобренйир вуйи. Аьлава улупбариинди, тIубкIувалин кьувват 3 килотонн тротил тIубкIувализ барабар ву (тевбан бадали – Хиросима ккидипу атомдин бомбайин кьувват тротилин 13-18 агъзур тонна тIубкIувализ барабар вуйи). ТIубкIувалин кьувватну 10 километр радиусдиъ айи хуларизра кмиди зарар тувну.
Гъийихдарин майтар дарагънайи хуларин гъюрдариккан ккадагъури ими. Жюрбежюр улупбариинди, ООН-дин 48 гъуллугъчийиз ва дурарин хизанарин 27 вакилиз зийнар гъахьну. Августдин 6-пи йигъан лисундин вахтназ айи улупбариинди, гъийихдарин ва зийнар гъахьидарин арайиъ Урусатдин ватандашар адар. Ливандин гьюкмари чпин меркез бедбахтвалин гьядиса гъабхьи йишвси мялум дапIна.
Бейрутдиъ гьюлин порт дагъитмиш дубхьна, шагьрин зиин завариъ биширугдин зегьерлу диф дийибгъна. Силисчйирин аьлава улупбариинди, Бейрутдин портнаъ сваркайин ляхнар апIурайиган, 12-пи пирсдиъ айи пиротехникайин ишкIарик цIа кабхъну, гьаддин кьяляхъ ярхла дарди порт-нан саб складдиъ уьбхюрайи аммиакдин 2750 тонна селитрайик кIуркIу цIюмгълари думу селитра тубкIувал гьяракатназ гъабхну.
ГьацI йис улихьна Ливандин хусуси метлеб айи гъуллугъари Бейрутдин портнаъ му кьадар селитра (нитрат аммония) гьапIуз уьбхюри аш, ахтармишар гъахури гъахьну. Думуган селитрайин гьаму кьадарнакан аьхю зарар хьуз мумкин вуйивал тасдикь гъапIнийи. Азотдин кислота, тIуркIру сяняаьтарин саб пайси, чюллериин дабгъру пейинсира ишлетмиш апIуру. Дюн’яйин гизаф уьлкйириъ аммонийдин нитрат пейинси масу тувувал къадагъа дапIна.
Бейрутдин портнаъ хьадан вахтна кондиционерар адру складариъ манишин 60 градусдиина удубчIвуру. Гьяйифки, хатIасузвал уьбхбан тIалабар тамам дапIнади гъабхьундар. Хъа сабсана, гьаму хатIалу гъагъ, рябкъру гьялариан, портнаъ уьбхюри 6 йискьан вуйи.
Ливандин сагъламвал уьбхбан Министерствойин кIулиъ айи Хамад Гьясанди къайд гъапIганси, Бейрутдин портнаъ гъабхьи дюшюшдин кьяляхъ меркездин больницйир зийнар гъахьидари абцIна. Душваъ корнавирус тарабгъбахъди айи аьгьвалатра гъагъи дубхьна. Урусатдиан, аьраб уьлкйириан, ЕС-дин членар вуйи гьюкуматариан Ливандиз кюмек туврударин дестйир дуфна. РФ-дин МЧС-дин кьюб самолетдиъди кюмек туврудар, мобильный госпиталь, COVID-19 кайивал ашкар апIру лаборатория, духтрар ва дарагънайи хуларикк ккайи инсанар агру хуйир хъуркьну. Дина гьаънайи кюмек туврударин дестйириз ва духтрариз дубхьнайи аьгьвалатнаъ ляхин апIбан лап ужуб тажруба а. Кюмек туврудари 10 йигъандин арайиъ гъвандин гъюрдарикк ккайи инсанар агиди.
Ливандин гьюкмин кIулиъ айидари Урусатдин рягьимлувалин кюмек тувуз гьязур вуйивалин теклиф кьабул гъапIну. Урусатдиан Ливандиз рягьимлувалин кюмек айи самолетар дуфна.
