Мягьячгъалайиъ айи Республикайин клиникайин больницайин терапевтвалин корпусдиъ коронавирусдин инфекцияйиан аьзарлу духьнайи инсанар кьабул апIури а. Дидин гьякьнаан августдин 25-пи йигъан Дагъустандин сагъламвал уьбхбан Министерствойин мялуматарин гъуллугъну хабар тувну.
Къайд апIувал лазим вуки, думу корпусдиъ 629 аьзарлуйир ккауз йишвар а. Коронавирусдиан аьзарлу духьнайидар кьабул апIуз хъюгъбахъди аьлакьалу вуди, Республикайин клиникайин больницайиз терапевтвалин жюре аьзарлуйир кьабул апIувал хъана вахтназ вуди хъябкьна.
КIваина хурача, медицинайин идарайин терапевтвалин отделение, аьзарлуйир кьабул апIури, июлин 8-пи йигъан аьдати къайдайинди либхуз хъюбгънийи. Дидиз улихьна душваъ COVID-19-диан аьзарлу духьнайидар кьабул апIурайи.
Гьаму ляхин ихь республикайиъ коронавирусдиан аьзарлу духьнайи агьалйирин кьадар хъана артухъ шулайивалихъди аьлакьалу ву.
Аьхиримжи улупбар гьамцдар ву:
2020-пи йисан августдин 27-пи йигъаз вуйи улупбариинди, Дагъустан Рес-публикайиъ коронавирусдиан аьзарлу гъахьидарин уьмуми кьадар 10716 кас ву. Аьхиримжи йишван ва йигъан тазади 65 касдик уьзур кубчIвну. Гъийин йигъаз Дагъустан Республикайиъ коронавирусдиан гъийихдарин кьадар 489 кас ву. Аьхиримжи йишван ва йигъан уьзриан сагъ духьну, больницайиъ дахънайи 46 кас чпин хулариз гьаъну. Республикайиъ думу уьзриан сагъ гъахьидарин уьмуми кьадар 9479 кас ву.
Гьюрматлу ватанагьлийир! Ухьуз рябкъюрайиси, аьзарлуйирин кьадар хъана артухъ шула. Ихтиятвал мудубганай. Инсанар гизаф уч шлу йишвариз дурушуз мумкинвал абгай. Ичв сагъламвалин гъайгъушнаъ йихьай.