Бажагьат… Арайиз гъафи гьякьикьатдихьна халкьдин терефнаан вуйи вижнасузвализ лигури, суалназ жаваб тувубра читин дар.
КIваина хурхьа, инсанарик сикинсузвал кипнайи COVID-19 уьзур тарабгъбаз къаршуди, хьадукран эвелариан башламиш дапIну, йи-швариин сикин дарди тялукь серенжемар гъухну.
Натижайиъ аьгьвалат саб гьял яваш апIру мумкинвал гъабхьнийи. Аьзарлуйир цIиб хьпан натижайиъ сагъламвал уьбхбан карханйир аьдати къайдайиинди лихуз хъюгъну, мялум дапIнайи карантин пучIу гъапIну. Амма, гьяйифки, агьалйириз кьюб-шубуб вазлин арайиъ алахьу читинваларикан, хиял апIин, саб жюрейинра дарс гъабхьундар:
уьзрин писвал кIваин дюбхну, ихтиятвал уьбхюри имбудар тек-биртIан гъузундар. Къадагъа апIбар пучIу гъапIси, гьам гъулариъ, гьамсана шагьрариъ сумчрар, саламар дагълуйириз хас къайдйириинди къайд апIувал кьувватнаъ ипну. Натижайиъ гъи уьзур, бегьем кьяляхъ хътабкайизра, цIийикIултIан жанлу хьуз хъюгъна.
Хив ЦРБ-йин кIулин духтрин заместитель Наида Пашаевайи субут апIурайиганси, коронавирус уьзур кьяляхъ хътабкбан натижайиъ дурари, аьзарлуйириз лазим вуйи кюмек тувбан бадали, ЦРБ-йин бицIидар хру отделениейиъ («уьру зона») 20 аьзарлуйиз дахъру йишвар ади гьязур дапIнайи госпиталь 25-пи июндиъ хъябкьнийи.
– ЦРБ-йиъ улихьна айи аьдати къайдайиинди ляхин давам гъапIнийи. Амма, гья-йифки, ихь ватандашари му уьзур бегьем кьяляхъ хътабкузкьан мумкинвал тувундар.
Аьзарлуйир хъанара мялум хьпан натижайиъ, августдин 22-пи йигълан мина цIийикIултIан думу госпиталь ачмиш апIуз мажбур гъахьунчу. Улупнайи вахтназ душваъ 13 аьзарлуйи чпин сагъламвал мюгькам апIура. Уьзур асас вуди Хирижв, ГъуштIил, Чювекк, Хив гъулариъ чIиви дубхьна.
Аьзарлуйириз гъуллугъ апIурайи сагъламвал уьбхру пишекрариз лазим вуйи яша-йишдин шартIар бицIидарин отделениейиъ (марцци зона) яратмиш дапIна.
Пуз ккундузузки, сагъламвал мюгькам апIбаъ, уьзур сагъ апIбаъ вахтниинди лазим вуйи кюмек тувувализ аьхю мяна а. Хъа арайиз дуфнайи аьгьвалатну субут апIурайиганси, агьалйири тамамвалиинди уьзрин къурхулувал аннамиш дапIнадар. Духтрарихьна кюмек ккун апIури, уьзур гъагъи дережайиз гъафиган илтIикIура. Натижайиъ думу сагъ апIузра гъагъиди алабхъура», – гъапну дугъу.
