Сентябрин 8-пи йигъан Дербент шагьрин мэр Хизри Абакаров Дагъустандин дишагьлийирин Союздин председатель Интизар Мамутаевайихъди ва Расул Гьямзатовдин ччвурнахъ хъайи Вари халкьарин фонднан вице-президент Гьябибат Аьзизовайихъди гюрюшмиш гъахьну.

 

Дуфнайи хялари къайд гъапIганси, дурар Дербентдиз гъюбан себеб – «Учу – дишагьлийир терроризмдиз аькси вуча» ччвур тувнайи «гергми стол» гъабхувал вуйи. Думу серенжем Дагъустандин дишагьлийирин Союзди ва РД-йин милли политикайинна диндин ляхнарин Министерствойи сатIиди тешкил дапIнайиб вуйи.

Гюрюшдиъ Дербентдиъ тикмиш апIурайи «Патриот» паркдин машгьур «Лунь» экранопландин багахь дебккуз ккайи гимийин месэла за гъапIнийи. Учуз айи мялуматариинди, думу ишлетмиш апIру вахт ккудубкIурайи, гьюлин сяргьятар уьрхру «Расул Гьямзатов» кIуру гими ву.

Эгер месэла гьял гъабхьиш, гимийиин кьюб ресторан ва гостиница ерлешмиш апIбанди ву. Думу жюрейин ляхнар, Урусатдин кюгьне шагьриз туристар жалб апIбан ва Дербентдиз гъафи хялариз, шагьрин агьалйириз рягьятвал гъадабгъру йишвар арайиз хпан бадали, гъахурайидар ву.

Шагьрин пресс-гъуллугънаан учуз туву мялуматариинди, Дербентдин мэри Расул Гьямзатовдин Фонднан вице-президент Гьябибат Аьзизовайиз гимийиъ музей тешкил апIуз теклиф гъапIнийи. Гьябибат Аьзизовайи Дербентдин главайин теклиф аьхю разивалиинди кьабул гъапIну. Чан нубатнаъ дугъу Дербент шагьрин глава Хизри Абакаровдиз Расул Гьямзатовдин шиърарин китаб пешкеш гъапIну.