Сувайнат Кюребегова
МУРЦIУН УКI’ИН ДЕЕБЦЦНАДАР ГЬЕЛЕ ЧИГ…
Шамил Къазиевдиз
Йиз гаф увкан дупнадарза гьелелиг,
Думу фициб шулуш сабан аьгъдариз.
МурцIун укI’ин деебццнадар гьеле чиг,
Дустарин кIваъ абхъну ими дерднан зиз.
Гъудужв, шаир! Увуз ккуни яв Кьаркьул
Чру дубхьна, мяхмрин алабхьну палат.
Ургуб гъат руг ув’ин алшра, гьич яв ул,
Хиял дариз, шулу кIури фаракьат.
МурцIун укI’ин деебццнадар гьеле чиг,
Йиз гаф увкан хъубкьну адар гьелелиг…
ПИРМЯГЬЯМАД АСЛАНОВДИЗ БАХШ
Сабсан гюлле гъивва, аьжал инсафсуз,
Хюрч хъипнайси багьа касарихъ узуз.
Сарихъди сар гъурхва дустар гирами,
Батмиш дапIну рюгьлувалин йиз гими.
Дабгъурайи цалгъян ахьрайси гъванар,
ЦIарариан дургурайиз мерд гафар.
Дубхьнайиган шиират шид хътру рягъин,
Ад ккунидар шула артухъ ва гъизгъин.
Инсафсузвал, гьапIрава йиз рюгьнакан?
Гьялак мабхьан батмиш апIуз йиз макан!.
ЦIин даргниин гъи ургури аш узу,
УзутIанна аьсир вушул йиз бахтсуз.
ТIалаб вуйиз, аьжал, апIин цIиб инсаф,
Дудрубгруси шаирарин гьякьлу гаф.
Мигъибтан хьуз аванд цIир цIару кучIлин,
Лигим ибшри гьякьлувал цIин ялвиин!
Кюребег Мурсалов
Ухди уьмриан гъушу Анавар ТIаибовдиз
Ургъин машин дебккри шулза гъягърури,
Хифарихъди дубхьну айи гьанавар,
УртIил гъулаз дийигъурза лигури –
Мушваъ дуланмиш шулайи Анавар.
Ав, шулайи… Гьамус, хьайизра хябяхъ,
Чюнгрин симси, кьатIар гъабхьну уьмрин рякъ.
Валлагь, уву рякъюз улар хъимийиз,
Увухъ хъпехъуз ва пуз гафар имийиз.
ГьапIхьа, уьмриъ шулдар вари ккунибси,
ЮкIв айирин кIваъ мумкин дар дерд дархьуб.
Амма кIул ис гъапIур дайва. Жилирси
Гъудужвуйва, гьархну кIваълан алдакуб.
Хуш зарафат шуйив гьарган мелзниин,
Ачухъ хабар гьатIарццуйва хялариз,
Аьшкьлу вуйва мектебдиъ яв ляхниин,
КIваан киври дарсар баяр-шубариз.
Гъушу вахтар, уьмур гъубшу, ккудубкIу,
Шамси, хулаъ убгурайи мучIушнаъ,
Аммаки, унчIваъси, ригъдин нур кубкIу,
Яв цIин манишин атIабгна пашман кIваъ.
Гъазимягьмад Шабалаев
БАРКАЛЛУ РЯКЪ
Дагъдик гъулан хулаъ Уьмран,
Кьуттиндарин тухмариан,
Бабу гъахну сар риш кIубан,
Шаир гъаши ихь Гюлбика.
Табасаран миллетдикан,
Сарпирди дишагьлийирикан,
Москвайин Литинститутдин
Жилгъа гъабхир ву Гюлбика.
Гьарсаб жигьат фикриъ бисрур,
БицIидимиди дикIуз хъюгъюр
Шиърар, нагълар, ихтилатар,
Шаир гъахьну ихь Гюлбика.
Дирчва дере, гъул-хал дипну,
Багъри ватандашди гъузну.
Абйирин ватан ву дупну,
Яв шиърариъ а, Гюлбика.
Проза, шиир, драматургия,
Мяналудар шул яв дурар.
Дуланажагъ вая пая*,
Эсерлуди шул, Гюлбика.
Сагъламвализ, мюгьюббатназ,
Хас вуйидар цIийи девриз,
Гьелбет, ватанпервервализ
Бахш апIурува, Гюлбика.
Бейдуллагьдизна Зумруддиз,
Кьалмиинди яв эмариз
ГъидикIу хуш шиърарин сес
Женнетдин багъ шул, Гюлбика.
Махлукьатдин мяргьяматдиз,
Урхрударин китабханайиз,
Яв эсерарин аьламдиз
Вафалу вува, Гюлбика.
60 йис, яв юбилей цци,
Яв эсерар урхудари,
Жигьилари, яшлуйири
Мубарак апIура, Гюлбика.
*пая – аьхю маргъ
