Коронавирусдин инфекцияйихъди аьлакьалу вуди ихь уьмриъ тIаънайи къадагъа апIувалариз дилигди, Табасаран театри чан гьаммишанлугъ тамашичйир театрин цIийи фасил ачмиш апIувалиинди шад гъапIну.
Фасил абццри, театри онлайн къайдайиинди «Миржир дишагьли» кIуру цIийи спектакль улупну. Му шадвалин гьядисайин гьякьнаан теат-рин директор Аьлимурад Аьлимурадовди гьамци кIура: «Гьяйифки, аьхиримжи вахтна ич тамашичйирихъди театрин залариъ гюрюшмиш хьуз мумкинвал адарчуз, амма театрин ляхин дийибгънадар, театри чан ляхин апIура. ЦIиб улихьнаси Дагъустан Республикайин культурайин министрин театрарин кIулиъ айидарихъди гъабхьи онлайн-совещаниейиъ Зарема Бутаевайи вари театрариз цIийи фасил онлайн къайдайиинди ачмиш апIуз табшуругъ тувну. Министрин гафариинди, республикайиъ айи эпидемиологияйин аьгьвалатну театрарин планламиш дапIнайи ляхниз манигъ’вал дапIну ккундар…»
Онлайн-спектакль гъябгъюрайи вахтна театрин гизаф тамашичйири, театрин коллектив цIийи фасил абццбахъди тебрик апIури, дидиз ляхниъ хъуркьувалар ккун апIури гъахьну. Дурарин гафариан тамашичйир ихь театрин коллективдихъди залиъ гюрюшмиш хьувалихъ дахарг-найивалра аьгъю шуйи. Ва му саягъ спектакль улупували Дагъустандихьан лап ярхла, жара юрдариъ яшамиш шулайи ихь ватанагьлийиризра спектаклариз лигуз мумкинвал тувну.
Театриъ «Миржир дишагьли» кIуру спектакль вари Урусатдин «Саб вуйи Урусат» политикайин партияйин «БицIи Ватандин культура» кIуру проект уьмриз кечирмиш апIбан программайин дахилнаъди дивнайиб ву. Спектакль диву режиссер Жанбулат Гьябибов, художник – Майтаб Мамедова ву.
Французарин шагьрарикан саб шагьриъ Марсель кIуру аькьюллу сар касдин хизандиъ бедбахтвал шулу – хизандин эйси чан ахникк дукIну дихъуру. Думу йивну гъакIир фуж вуйкIан? Хпир, хпирин чи, дугъан шубар, баб, гъараваш дишагьлийир, чан Марселин чи – фунури вушра думу йикIуб мумкин ву. Варидариин шакра ал. Ва гьарсар дишагьлийиз Марсель йивну йикIуз багьнара а. Амма дурарихьан думу йивну йикIуз шуйкIан?
Марсель йикIувалин себебар ахтармиш апIури, му хизандин гизаф жини ляхнар ашкар шула. Гьамусдиз дурари маскайикк жин дапIнайиб вари зиина удубчIвура – кучIал, бахилвал, нефс, намуссузвал…
«Миржир дишагьли» спектакли ухьуз ихь багахь анжагъ чпин уж’валнакантIан фикир дарапIрайи, анжагъ чпин хайирнантIан гъайгъушнаъ адру инсанар фукьан хьаш ва дурари чпин гъвалахъ хъайи багъри инсанариз фициб дерд хураш, фикир апIуз мумкинвал тувра.
