Гьюрматлу «Табасарандин нурар» газат урхурайидар ва газатдин редакцияйиъ лихурайидар. Улихьнаси «Табасарандин нурар» газатди «Йиз дада дюн’яйиъ варитIан ужур ву» темайиан мектебариъ урхурайидарин арайиъ сочинение бикIбаан вуйи конкурс тешкил дапIну гъябкъиган, узу ухдитIан мектеб ккудубкIнушра, узузра дадайикан бикIуз ккун гъабхьунзуз.

Дада гъяркъиган, узу лап бицIирси шулза. Имбударра вари, чпиз чпин дада гъяркъиган, гьаму узузси шулу хьибди.

Йиз дадайиз Шевле Мягьямедова кIуру. Цци июндин вазлиъ дугъан, умуд кивраза, 90 йис тамам хьибди.

Фикир гъапIиган, йиз дада гизаф гужли инсан ву. Думу 1929-пи йисан НичIрас гъулаъ нежбрин хизандиъ бабкан гъахьну. Дугъаз дявдин вахтар, гашун вахтар вари гъяркъну. Читин йисари дугъу, ихь имбуну дагълу дишагьлийириси, атIнар урхури, дурар фашистарихъди учIру женгариъ айи ихь эскрариз хътаури гъахьну.

Чан уьмрин аьхюнубсиб пай гъулаъ гьапIу дугъу гьич сар касдизра гиран ктапIундар. Гьамусяаьт дада чан балихъди Армавир шагьриъ яшамиш шула. Жвувандариси, багарихь хьайи жара миллетарин, жара динагьлийирин терефнаанра дугъаз апIурайи гьюрмат гъябкъиган, узу йиз кьабиваликан фикир апIуз хъюгъри шулза.

Халис табасаран хизандиъси, ич дадайин хизандиъра 3 байна 6 риш айи. Аьхюну бай рягьматдиз гъушну. Хъа гъийин йигъаз дугъаз 140 худлар – гудлар ва 2 цIудулра а.

Гьаму йиз дадайизси, вари дадйириз Аллагьу Тааьлайи гьарган кIван шадвал, сагъу, ярхи ва бахтлу уьмур туври.

Дада

Дадайи кIуру гаф маниб ву,
Дадайи гъивишра, ккун шулу.
Дадайи гъивишра, ккун шулу,
ВаритIан кIваз багьа дада.

Лай-лай кIури, шинт дабкьури,
Ширин гафар учуз кIури,
Никк амдруган, берччем туври,
Учу аьхю гъапIу дада.

Яв сес вардиз ширинуб ву,
Уву гъяркъиган, юкIв шад шулу,
Яв насигьят жандик кабсру,
ВаритIан гирами дада.