Цифрайин телевещание ляхник кипували телекоммуникацияйин гъурулуш цIийи дережайиз адапIну: аналогдин радиостанцияйин сигнал рубкьури адру йишвариъра лап марцци сигнал бисура. Цифрайин радиоприемникари лап яркьу аьтрафар дидисну ккунду. Хъа ляхин апIуз хъюгъиган, гьял апIуз даршлу месэлйир арайиз удучIвуру.
Цифрайин телевидение бисру йишвариз, табиаьтдин жюрбежюр гьавйириси, гьарсаб региондин география жигьатнаан айи тафавутлуваларира тясир апIуру.
Дагъустандиъ, цифрайин сигнал вари йишвариз рубкьбан бадали, гизаф зегьмет дизигнашра, 117 йишваъ думу бисурадар. Фицики дагълу йишвариз сигнал тувуз читинвалар алахьура. Гизаф йишвариъ улихьна айи антенйирин гъурулушар аьлава техникайихъди тямин дапIна. РТРС-дин Дагъустандиъ айи филиалин улупбариинди, цифрайин сигнал рубкьури адру гизаф гъулариъ аьхиримжи йицIуд йисан фужкIа яшамиш шуладар. Хъа 45 гъулаъ бязи хулариз цифрайин сигнал рубкьура, хъа бязидар сигнал адарди гъузра.
Мисалназ, Хив райондин Ляхла гъул гъадабгъурхьа. Аналогдин телевещаниейин сабпи канал улупбан бадали, му гъулаз 1 Ватт айи передатчик дивнайи, фицики думу гъул ямаж кайи йишваъ, багахь хьайи дагъларин 300 метр ичIаъ ерлешмиш дубхьна. Цифрайин ТВ-йин думу гъулахьна варитIан багахь вуйи станция Хив райондин ВертIил гъулан аьтрафариин дивна, Ляхла гъулан сакьюдар хулари сабпи ва кьюбпи мультиплексарин сигнал бисура, имбу гъуландар аналогдин сабпи канализ лигури гъузна. Аьхиримжи переписдиинди Ляхла гъулаъ 612 агьали яшамиш шула.
