Урусатдин Президент Владимир Путинди Федералин Собраниейихьна вуйи чан Посланиейиъ, жямяаьтлугъ яшайиш гъулай, гьюкумат артмиш апIбан жигьатнаан гьял дапIну ккуни саб жерге месэлйирихъди сабси, жигьиларин политикайизра дикъатлу фикир тувна. Гъийин девриъ жигьиларин жергйириъ гъулай яшайиш ккабалгбаз манигъ’вал апIурайи хайлин учIру месэлйир гъузра. Дурарин арайиъ жигьилариз йишвариин экономикайин, жямяаьтлугъдинна политикайин уьмриъ деврин тIалабариз ва дигиш’валариз гъилигу шартIар ва мумкинвалар яратмиш апIували асас йишв бисура.
– Урусатдиъ, гьадму гьисабнаан Дагъустандиъ, жигьиларин месэлйир гьял апIбан гьякьнаан гъахурайи серенжемар фикирназ гъадагъну, Хив райондиъра, айи мумкинвалариз лигну, лазим вуйи уьлчмйир кьабул апIура, – ккебгънийи ич сюгьбат Хив райондин культурайинна спортдин, туризмдин ва жигьиларин месэлйириз лигру отделин кIулин пишекар Расим Акимовди. – Жигьилар ватанпересвалин, рюгьлувалин гьиссариккди тербияламиш апIури, райондиъ спорт артмиш апIбаз аьхю фикир тувра. Гьар йисан, жюрбежюр машкврарин йигъариз тялукь вуди, спортдин талитар тешкил апIура ва дурариъ жигьилари заан иштирак’вал улупура.
Му жигьатнаан жигьилариз хайлин шартIарра яратмиш дапIна. Гьаци, жикъи муддатнаъ Хив райондин жюрбежюр гъулариъ (Хив-2, ЦIийи Фрюгъ, ЗахитI, Асккан АрхъитI, ЦIанитI, Чювекк, Гъвандик, Ляхла, Мажвгул, Сюгют, Хирижв, Кашкент, Асккан Яракк) 14 воркаут майднар ишлетмиш’вализ тувна. ЦIийиди ГъванцIил ва ГъуштIил гъулариъ спортзалар ачмиш дапIна.
Дидланра савайи, волонтерарин жергйир яркьу апIбаз дикъатлу фикир туврача: улупнайи вахтназ дурарин арайиъ Хив райондин 111 живан а. Дурар райондин дережа-йиъди кIули гъахурайи жюрбежюр акцйирин асас иштиракчйир ва кIакIначйир ву. Гьаци, ккудубшу йисан райондин сяргьятариин волонтерарин иштирак’валиинди «Ачухъ сечкйир», «Зарница», «Уж’валнан йигъар», «Уж’валнан гьяфта», «Гъалибчйирин наслар», «Аьжалсуз полк», «Узу урусатлу – узу дагъустанлу», «Ккундузуз уву, Урусат!» ва гьацдар жара серенжемар кIули духнача.
Ав, жигьилар ватанпервервалин лишниккди тербияламиш апIбан рякъкан ва, спорт артмиш апIури, Хив райондиъ гъахурайи серенжемарикан сикин дарди улхуз шулу. Кьабул апIурайи уьлчмйири артмиш шулайи наслар рюгьлувалин, эдеблувалин гьиссариккди тербияламиш апIбаъ важиб- лу йишв бисура. Жигьилариз къурхулу месэлйирин гьякьнаан мектебарин мялимарин, къанун уьбхру ва живанаринна хизанарин месэлйириз лигру гъуллугъчйирин, динагьлийирин иштирак’валиинди вахт-вахтарик артмиш шулайи наслин вакиларихъди гюрюшарра тешкил апIурача. Душваъ асас вуди диндихъди аьлакьалу читин месэлйирикан, наркотикарин хатIалуваликан, жигьилар му чиркин ва къурхулу рякъюз жалб апIурайи себебарикан, дурар гьял апIбан рякъярикан улхура. Хив райондиъ йишвариин жямяаьтлугъдин арайиъ му жигьатнаан гъаврикк ккаъбан ляхин гъабхура. Вушра, гьяйифки, камиваларра хайлин гъузра ва гьелелиг я архаин хьуз, я фурс апIуз шулдар, – аьлава гъапIну дугъу.
