Ккуни мялим, аьхю гьюрмат айи пишекар, жямяаьтлугъ кас…. Гьаму гафар, саб шакра адарди, ТинтӀарин кьялан мектебдиъ директорвал апӀурайи Фятягьов Аьбдулфятягь Зейнудиновичдин адресназ пуз шулу.

 

Аьбдулфятягь Фятягьовди, 1999-пи йисан ДГУ-йиъ урхувал ккудубкӀну, багъри мектебдиъ мялимвал апӀуз хъюгъну. Садпи йигъарилан мина дугъу чахъди лихурайи яшлу мялимарин терефнаан ужуб кьимат, хъа чахь урхурайи бицӀидарин терефнаан аьхю гьюрмат гъазанмиш гъапӀну. Гъийин йигъаз, йисариинди зигурайи жафайиз лайикьлу кьимат вуди, дугъу гизаф гьюрматнан грамотйир, райондин главайин терефнаан грантар гъадагъна.

Урхбан йис ккудубкӀбан аьхириъ гъахурайи ЕГЭ-йин натижйириан рякъюрайиганси, дугъахь урхурайидарии 70-80% хъуркьувалин дережа улупура.

Мялимвалин ляхин апIбахъди сабси, Аьбдулфятягь Зейнудинович жямяаьтдин ляхнариъра гьевеслуди иштирак шула. Гъуландарин, мялимарин ва бицӀидарин арайиъ дугъу, учв кIваантIан спортдиин машгъул вуди, жвуван сагъ’валин гъайгъу зигну ккунивалин гьякьнаан гъаврикк ккаъбан ляхин гъабхура. Табасаран миллет, багъри юрд ва чӀал гъизгъинди ккунивалин аьшкь жин апӀуз даршули, бабан чӀалниинди Ватандиз бахш вуйи гьевеслу шиърарра дикӀура.

Аьхиримжи кьюд йисандин арайиъ, коллективдин мясляаьтниинди, дугъу мектебдиз регьбервал тувра. Гьамдихъди сабси, дугъан гъарашугъа- ри му касдин кандидатура «РФ-дин уьмуми образованиейин гьюрматлу гъуллугъчи» ччвур тувбазра улупна.

Гьюрматлу абайин гьюрматлу бай! КӀваъ айи, кӀул’ина дидиснайи ляхнариъ аьхю хъуркьувалар ишривуз!