Мартдин 20-пи йигъан Мягьячгъала шагьриъ дуствалин Хулаъ Дагъустандин Глава Владимир Васильев РД-йин Халкьдин Собраниейихьна Послание хьади илтIикIну.
Сессия парламентдин сарпи вице-спикер Сайгидягьмад Аьгьмедовди ачмиш гъапIну.
Сессияйин ляхниъ РФ-дин Федералин Собраниейин Федерацияйин Советдин Председателин заместитель Ильяс Умаханов, Гью-куматдин Думайин депутатар Гьяжимет Сафарялиев, Юрий Левицкий, Мурад Гьяжиев, Валерий Газаев, Аьбдулмажид Мягьрамов, РД-йин Халкьдин Собраниейин депутатар, Правительствойин членар, Конституционный ва Верховный сударин, министерствйирин ва идарйирин кIулиъ айидар, республикайин шагьрарин ва районарин главйир, шагьрарин ва районарин депутатарин собранйирин регьбрар, республикайин аьдати динарин кIулиъ айидар, жямяаьтлугъ касар ва СМИ-йин вакилар иштирак гъахьну.
Залиъ сифте Урусатдин Федерацияйин, хъасин Дагъустан Республикайин гимнар йивбан кьяляхъ, Владимир Васильевди чан Послание гъурхну.
«Гьюрматлу Дагъустан Республикайин Халкьдин Собраниейин депутатар! Гьюрматлу дагъустанлуйир!
Гъи гьаму заан дережайин собраниейин улихь Дагъустан Республикайин багахь гележегдин артмиш’валикан, ихь жямяаьтлугъдин улихь ди- йигънайи месэлйирикан ва дурар гьял апIбан рякъярикан улхуз ккундузуз. Ухьу варидари Дагъустандин халкьдин улихь жаваб туврахьа. Ва гъи узуз Дагъустандин аьгьвалатнакан ктибтувал ва ухьуз мянфяаьтлу артмиш’валин рякъяр фтиъ рякъюраш, ачухъ апIувал важиблу вузуз»,
– ккебгънийи чан улхуб респуб-ликайин Главайи.
Владимир Васильевди федералин министерствйирихъди ва гьюкмин тамам апIру органарихъди сабхилди гъабхурайи ляхникан ктибт-нийи. Дугъан гафариинди, Дагъустан Республикайи федералин 28 идарайихъди сатIиди ляхин гъабхура.
«Республикайин экономи-кайин артмиш’вализ 11 миллиард манат жалб апIиди. Миди, федералин центриан ухьухьна вуйи ихтибарвалихъди сабси, кьатI’и жавабдарваликанра кIура», – къайд гъапIну Главайи. Дугъу гьацира республикайин мяишат къайдайиз гъабхи къанун уьбхру органарин вакилариз чухсагъул мялум гъапIну ва «Йиз Дагъустан» кIуру кадрйирин конкурсдиканра ктибтну. Главайи гъапиганси, думу конкурсдиъ гъалиб гъахьи жигьилар республикайин гележегдин артмиш’вализ даягъси гьисаб ву. «Дурар ихь варидарин пай кайи девлет, ихь дамагъ ву. Узу дурарик аьхю миж кивраза», – мялум гъапIну В.Васильевди, конкурсдин гъалибчйирикан улхури.
Республикайин асас учIру месэлйирикан саб-бицIи маважибарихъди аьлакьалу шула. РД-йин Глава му месэлайин гьякьнаанра тамамди гъулхнийи.
«Дагъустандин Правительствойикан мялимарин, духтрарин ва бюджетдин цирклин жара гъуллугъчйирин маважибар за апIуз мумкинвалар агувал ккун апIураза», – гъапну Владимир Аьбдуаьлиевичди.
Гьацира Владимир Васильевди чан Посланиейиъ сакьат касар, уьмрин гъагъи аьгьвалатнаъ ахъу хизанар хуларихъди тямин апIбан, сагъламвалин, образованиейин, налогар уч апIбан, республикайиз инвестицйир жалб апIбан, дилаварчивалин, убхъру штухъди тямин апIбан ва рякъярин, газдин ва экологияйин цирклин, тикилишчивалин, «сирникк» гъубзрайи экономикайин, промышленностдин, гъулан мяишатдин, туризмдин, культурайин, спортдин месэлйир яркьуди арайиз адагъну.
Владимир Васильевдин Посланиейихъди тамамди «Табасарандин нурар» газатдин гьаму ва гъюру нумрйириъ «Годекандин» машариъ таниш хьуз шулучвхьан.
