13-пи октябриъ Табасаран райондиан Урусатдин Яракьлу Кьувватариъ гъуллугъ апIуз 7 жигьил эскрарикан ибарат вуйи десте рякъюъ убчIвну. Чвлин призыв 1-пи октябриан 31-пи декабризкьан кIули гъябгъиди. Гьадму вахтнан арайиъ Табасаран райондиан Яракьлу Кьувватарин жергйириъ гъуллугъ апIуз вари хьуцIурихьна жигьилар гьаъбанди ву. Призывдин кампания, коронавирусдихъди аьлакьалу вуди, Роспотребнадзорин вари тIалабар тамам апIури кIули гъябгъюра.
Урусатдин Яракьлу Кьувватариъ гъуллугъ апIуз гъягъюрайи жигьил эскрарин улихь, дурариз насигьятнан гафар кIури, Табасаран райондин главайин заместитель Рамис Уьсманов удучIвну гъулхнийи. Дугъу гьамци гъапнийи: «Учву ватандин улихь ичв буржи намуслувалиинди тамам апIур, ичв улихьди Урусатдин Яракьлу Кьуватариъ гъуллугъ апIуз душнайи ихь игит эскрари гъазанмиш гъапIу ад учву зяя дарапIур кIури, миж кайич. Учву гъуллугъ апIру сад йисандин жикъи вахтнан арайиъ аьхю хъуркьувалар гъазанмиш апIруганси ибшри. Чан терефнаан Табасаран райондин глава Мягьямед Къурбановдира учвуз рякъюъ марццишин уьбхюз лазим вуйи шей’ар айи пакетар тувну».
Табасаран райондин военный комиссар Садикь Мурадялиевди ццийин призыв, Роспотребнадзорин тIалабариз асас вуди, цIибтIан инсанар уч дарапIди, абйир-бабар ва дустар хътарди, гьамциб бицIи серенжемдиинди кIули гъабхурайиваликан гъапнийи ва жигьилариз ягъурлу рякъ хьуб ккун гъапIнийи.
Призывникар гьязур апIру отделениейин начальник Рафик Кьасумовди, армияйиз гъягъюрайи жигьилар Урусатдин Яракьлу Кьувватариъ гъуллугъ апIурайи ихь игит эскрарин командирарихьан дуфнайи кагъзарихъди таниш гъапIнийи. «Гьамцдар ужувлан кагъзар ичв командирарихьанра гъюр кIури, умуд кайич. Учвкан 5 кас ВВС-диз, хъа 2 кас къураматдин кьушмариз жара дапIна. 2 йигъан Дагъустан Республикайин призывдин пунктдиъ духтрар хъана ичв сагъламвализ лигиди. 15-пи октябриъ учву Мягьячгъала шагьриан гъуллугъ гъабхру дявдин частариз гъахиди. Душваъра учвуз эскервалин палат ва лазим вуйи шей’ар тувди», – аьлава гъапIнийи дугъу.
Гьацира абйир-бабарира дурариз ягъурлу рякъ ккун гъапIнийи. Гьамци, газель машиндиъ итну, жигьил эскрар рякъюъ тIаъну.
