Гьамусяаьт РФ-дин гъулан мяишатдин министерствойи, «Урусатдин тIяъмар» ччвур тувну, регионарин гъулан мяишатдин сурсатарин брендар гъядягъювал себеб вуди, милли конкурс тешкил дапIна.

 

Къайд апIуб лазим вуки, му вкусыроссии.рф ва russiantastes.ru сайтариъ 19-пи ноябриан 2-пи декабризкьан гъябгъру конкурс, регионариъ гьясил апIурайи итIру сурсатарикан мялуматар тарагъбан бадали, тешкил дапIнайиб ву.

Дагъустан Республикайиан конкурсдиъ иштирак хьуз 6 сурсат улупна: дагъустандин чарвайин йикк, дагъустандин мишмишарин шире, дагъустандин чарвйирин нис, дагъустандин гъеебццу дулдурма, дагъустандин укIарин чай ва дагъустандин пIялцIук. 8 номинацйириан жюрийи 22 финалистар, хъа сарсана гъалибчи – халкьди сесер тувбиинди гъядягъиди. Конкурсдиъ финалистар гъядягъбан кьяляхъ, регионарин гъулан мяишатдин бренд гъабхьи сурсат артмиш апIбан бадали, яркьу программа гьяракатнаъ ипди.

Гьюрматлу ватанагьлийир! Конкурсдиъ ихь республикайин нежбрари гьясил апIурайи гъулан мяишатдин сурсатар гъалиб хьпан бадали, учвура пай кивай, вкусыроссии.рф ва russiantastes.ru сайтариъ учIвну, дурарихъанди сесер тувай!