Бабкан бицIир гъахьиган, сумчир вая жара шадлугънан мярака айиган, кетIерццну дахънайириин улукьуз гъушу вахтна, ухьу дурариз варидариз ярхи уьмур, сагъ’вал тувуб Аллагьдикан ккун апIури шулхьа. Хъа дурар гаф бадали кIурайи гьацдар тIалабар ву.
Эгер инсанди чав жвуван уьмур дюрюбхиш, дугъаз саб гафнура кюмек апIудар. Уьмур ширин мутму ву, гьаддиз дидиз хъайивалра дапIну ккунду. Уьмур йикIайиз шубуд йигъ улихьна уьбхруб дар, хъа уьзур кивайиз шубуд йис улихьна кIури, китай халкьдин айту айиб ву. Аьхиримжи йисари яшар бегьем дархьи фукьан жигьилар йихураш, ухьуз телевизориан рябкъюрахьуз, интернетдиан урхурахьа ва ебхьурахьуз. Варибдин тахсиркрарра фйир вуш аьгъяхьуз – лицензия адру, подвлариъ гьязур апIурайи ички, инсандин психикайиз чIуру тясир апIру таблеткйир, химияйин жюрбежюр шей’ар, наркотикар. Гьюкуматди ижми къадагъа апIбан къарарар адагънашра, гьяйифки, му чIуру шей’ар ихь арайиан терг апIуз удукьурадар, хъа дурарин тIяаьм абгуз, ички, наркотикар ишлетмиш апIуз ккуни жигьиларин кьадар йигълан-йигъаз артухъ шула. Гизаф зарар кайи зегьерлу ляхин вуйиб аьгъяшра, чиб жигьилари чпин уьмур жикъи апIура ва жюрбежюр уьзрар уьмриз гъазанмиш апIура. Мурариланра гъайри, къадагъа дапIну адру, инсандин уьмур жикъи апIурайи сабсан иблис а. Думу фу ву гъапиш, гъийин девриъ яшлуйирира, дишагьлийирира, живанарира зигурайи папрус. Пачкайин зиин ачухъди рябкъюри «Дюднин, гъурдларин рак арайиз гъюз гъитру» ва хъана жара гьацдар гучI ккапIру гафар дидикIнашра, дидхьанра аьхю пай инсанар ярхла шуладар. Папрус зигру гьацдар инсанар аки, гвачIнинган нивкI’ан уягъ гъахьиган, штуз саб хумпI апIайиз, жандик марцци гьава кубкIайиз, гьяракат кади папрусиз цIа йивну, чпин гъурдлар-ликIариз кум туврудар. Фикир гъапIиган, му уьзур дарин? Папруси уьмриз ва пулиз фициб зарар тувраш, лигай. ВаритIан ужуз папрусин пачкайин кьимат 50 манат ву, хъа саб пачкайиз 200-250 манат кIуру папрусарра а. Му кьимат хизандиз масу гъадагъурайи итIру сурсатарин гьякьназ илтIибкIиган, дидихъ швнуб буханка уьл, швнуб кило шекер, пачка кьил гъадагъуз шулаш, лигай. Гьацдар инсанар аки, саб пачка папрус сад йигъаз бес даршлудар. Сабра дарди уьмризна пулиз цIа йивурайи мутIан аьхю жара зарар сарун айинхъа?! Эгер, рякъ-хулиъ ади, шид ккунди, гаш кади гъабхьиш, таниш дару касдиз шид-уьл ча пуз инсандиз яманди начди шулу, я саспиган, гашди, штухъ хумарди гъузнура, дугъкан тIалабра апIуз шулдар, хъа папрус, саб нач’валра адарди, зат жвуваз аьгъдру, сабпи ражну рякъюрайи касдикан тIалаб апIуру.
Дугъриданра, папрус яман иблис ву, кIуру гафар гьякьлудар ву. Ич мялимди, папрус зигру касдиз шубуб уж’валнан ляхин а, кIури, аьлхъюри шуйи. Саб гъапиб, папрус зигрур кьаби шулдар, гьаз гъапиш кьаби хьайиз думу йикIуру. Кьюб гъапиб, папрус зигру кас хуйи дисурадар, гьаз гъапиш дугъан ушвниан ва палтарихъан хяви ниъ гъюри шулу. Шубуб гъапиб, дугъахьна икIар апIуз йишвну гъачагъ гъюрдар, гьаз гъапиш думу, фуну вахтна кIваин гъабхьишра, папрус зигури деъну шулу, ясана даахнайиганра дугъу уьгьйир апIуру. Гьюрматлу ватанагьлийир, му ляхнихьан ярхла йихьай. Ичв уьмур уьбхяй, уьмур ширин мутму ву.
Йиз макьала узу гъибикIу шиъриинди ккудубкIуз ккунди айиз.
КIару шейтIан
ГатIабхь гьаму папрус, Гьясан,
Шулдар дидкан сабаб, дарман.
Жигьил жандик кади гьевес,
ГьубкIри адар увуз нефес.
Ярхла апIин думу увхьан,
Жигьил жандихъ мягьрум махьан.
Уьмриъ дархьи увуз мажал,
Хибди диди ухди аьжал.
Хьибди увуз уьмур гьяйиф,
Зигну папрус гъабхьи зяйиф.
ГъапIну кIури кьанди фигъан,
Хьибдар увуз сарун дарман.
Папрус зигуз гьялак махьан,
ГатIабхь уву думу шейтIан.
Жигьил жандин дубгну аман,
Хьибди увуз уьзур яман.
Фикир апIин сацIибди, дуст,
Дип уву зегьерлу папрус.
Саризра думу лазим дар,
Хай ляхин диди апIидар.
