Аьхиримжи вахтари ихь жигьилари, чпин проектар хьади жюрбежюр конкурсариъ иштирак шули, грантар гъадагъура. Жигьиларин, физический касарин арайиъ тешкил апIру грантар тувру конкурсар асас вуди «Росмолодежь» АИС-дин сайтдиъ гъягъюри шулу.
Улихьнаси дициб конкурсдиъ грантар гъадагъу табасаран баярикан учу газатдин сайтдиъ гъибикIнийча. Гьадмуган грантар гъадагъу ихь ватанагьлийирин арайиъ Н.Э.Баумандин ччвурнахъ хъайи Москвайин государствойин технический университетдиъ магистратурайин 1-пи курснаъ урхурайи, Хив райондин Зилдикк гъул’ан Дербент шагьриз кючмиш гъахьи Ренат Ханмягьямедовра (шиклиъ) а.
Ихь ватанагьлийи конкурсдиз хътапIу «KavNetworking» проект жюрийиз кьабул гъабхьну, ва думу уьмриз кечирмиш апIуз 1 миллионна 600 агъзур манатдин грант тувну.
Ренат Ханмягьямедовдин проект Кафари Кавказдин бажаранлу жигьиларин мумкинвалар ва удукьувалар уьмриз юрутмиш апIбан ва дурар гележегдиъ лихру йишварихъди тямин апIбан бадали, дурариз пише ктабгъуз ва насигьятчивалин кюмек тувуз жалб дапIнайиб ву.
«Кафари Кавказдин Чер-кеск, Нальчик, Мягьячгъала, Магас, Грозный, Влади-кавказ шагьрариъ, ва гьацира Москвайиъ «KavNetworking» проектдин дахилнаъди насигьятчивалин серенжемар тешкил апIбанди вуза. Дурар улупнайи регионариъ айи «Точка кипения» АСИ-йин центрариъ кIули гъягъиди. Кафари Кавказдин регионариъ гъягъру гьарсаб серенжемдиъ 100 кас – ужуди урхурайи студентар, магистратурайиъ, аспирантурайиъ урхурайидар ва тазади ляхнихъ хъюгърайи пишекрар иштирак хьиди, хъа Москвайиъ – 200 кас, уьмуми гьсабариинди – 550 кас»,
– ктибтнийи Ренатди.
Проект гъюру йисан февралин вазлиъ уьмриз кечирмиш апIуз хъюгъди.
«Йиз проектдин асас вазифа – регионариъ айи вари Урусатдин жюрбежюр тешкилатарихъди («Урусатдин даягъ», «Ляхнарин Урусат») ва гьацира регионарин Алвер-чивалинна промышленностдин палатайирихъди сатIиди ляхин апIури ва проектдиз экспертар-насигьятчйир жалб апIури, насигьятчивалин дестйир артмиш апIувал ву.
Гьаму жюрейиинди ляхин апIували бажаранлу жигьиларик хъанара артухъ гьевес кубчIвуз гъитди»,
– аьлава гъапIну Ренат Ханмягьямедовди.
