Мартдин 22-23-пи йигъари Германияйин Бохум кIуру шагьриъ Big Game MMA жюрейин спортдиан тешкил дапIнайи талитар кIули гъушну. Думу талитариъ ихь ватанагьли Артур Аьлиевра иштирак гъахьну.

«Табасарандин нурар» газатдиз Артури туву мялуматариинди, зиихъ къайд дапIнайи тешкилатди кIули гъубху чемпионат вари дюн’яйин чемпионвалин гьюрматнан ччвур тувуз кIури, тешкил дапIнайиб вуйи.

«Му чемпионатдиъ узухъди талитназ Голландияйиан вуйи Джоржи Баккес кIуру спортсмен удучIвнийи. Думу муганайиз танишур дайзуз, фицики сифте кIул’ан узухъди талитназ гьязур дапIнайир, кчIихбарихьна гьязур шулайиган иццру апIувализ лигну, гьюдюхнийи. Учв спортсмен дзюдойиан дюн’йиан чемпионатдиъ пешкешнан йишв гъадабгъур, гизаф гужли, талитнахьна ужуди гьязур духьнайир вуйи»,

– гъапнийи Артур.

ММА жюрейин спортдиан 66 кило гъагъишин айи спортсменарин арайиъ талитназ удучIву Артур Аьлиев Голландияйиан вуйи спортсмендиин гъалиб гъахьну ва чемпионвалин чIулра хьади Урусатдиз хъадакну гъафну.

Гъит, Артурин уьмриъ гьамцдар гъалибвалар хъанара артухъ ишри! Мицисдар кIубан спортсмен баяр ихь халкьдин дамагъ ву.