2020-пи йисан Табасаран райондиъ спортдин циркил арт-миш апIбаъра, жюрбежюр талитариъ гъалибвалар гъадагъбаъра ужудар хъуркьувалар гъазанмиш гъапIну. Дурарикан яркьуди ич мухбир Ражаб Нуровдиз райондин культурайин, спортдин, туризмдин ва жигьиларин ляхнариз лигру отделин начальникдин вазифйир тамам апIурайи Садикь Уьсмановди ктибтну.
– Садикь Аьлимягьямедович, Табасаран райондиъ спортдиин машгъул вуйи-дариз фицдар шартIар яратмиш дапIана?
– Гьамусяаьт Табасаран райондиъ спортдин 13 майдан тикмиш дапIна.
Кьалухъ Мирзайин ччвурнахъ хъайи спортдин дараматдин манишнахъди тямин апIру гъурулушра рас дапIну ккудубкIну. Кьюб кабинетра, гьямамра, санузелра рас гъапIну. Гьамус душваъ спортсменарихъди кьюрдун вахтнара ляхин гъабхуз шулу.
ГТО-йин программа-йизра райондиъ аьхю фикир тувра. ГТО-йин нормативар тамам апIбан бадали, лазим вуйи вари алатарра масу гъадагъна. Хючнаъ айи спортдин аьхю майданра цIийи алапIну. Тамашичйириз деъру пластикдин креслойирра дивна, майдандин айитIишв дюз гъапIну, гъирагъдихъди жаргъру йишварра ккабалгну, акварра гъизигну, гургутум рукьан арчил илтIибкIну.
Гъи Табасаран райондин кIулиъ айидари образованиейин тешкилатар спортдин лазим вуйи авадлугъарихъди тямин апIбаз аьхю фикир тувра. Физкультурайинна спортдин дарсар гъахбан бадали, 17 гъулаъ воркаут кIуру спортдин тикилишар дивна.
2020-пи йисан райондиъ 4 воркаутдин майднар тикмиш гъапIну. ЦIийи йис ккебгъайиз, спортдин 4-сан майдан ачмиш апIбанди ву.
– 2020-пи йисан спортдин цирклиъ гъазанмиш гъапIу хъуркьуваларикан фу пуз шулвухьан?
– Спортдиъ гъазанмиш гъапIу хъуркьуваларикан ктибтуруш, волейболиан 2005-2006-пи йисари бабкан гъахьи жигьиларин арайиъ ЮФО-йиъ, СКФО-йиъ ва Крым Республикайиъ кIули гъубшу «Арсран туп» кIуру турнириъ Табасаран райондин волейболин командайи сабпи йишв гъибисну.
Хъа декабрин 2-10-пи йигъари Воронеж шагьриъ гьадму турнирин финал кIули гъубшну. Душваъ РФ-дин федералин округариъ кIули гъушу талитарин гъалибчйир ва пешкешнан йишварин сагьибар вуйи 14 команда иштирак гъахьнийи. Натижайиъ сабпи йишв Ново-Куйбышевск шагьрин волейболин командайи гъадабгъну, кьюбпи йишв Пермь шагьрин командайиз гъабхьну, шубубпи йишван сагьиб Табасаран райондин волейболин команда гъабхьну. Табасаран райондин команда Халгъарин кьялан мектебдиъ тешкил дапIнайиб ву, дидин тренер Исрафил Мягьямедов ву. Думу команда гьязур апIбак ДЮСШ-дин тренерар Даниял Гьяжиевди (АхьтIарин кьялан мектеб), Руслан Ражабовди (ФуркIларин кьялан мектеб), Аьбдулнасир Аьгьмедовди (Хянгъярин кьялан мектеб) Закир Шихмягьямедовди (Дагъниарин бинайин уьмуми аьгъювалар тувбан мектеб) чпин пай кивну, гьацира шубубпи нумрайин ДЮСШ-дин директор Ярягьмед Шамхаловдира жанлу иштирак’вал улупну.
– Муниципалин образованиейи спортдин цирклиъ ктабхъурайи йисан фициб ляхин дубхна?
– 2020-пи йис Табасаран райондин спортдин цирклиз хайирлу йисси гьисаб апIуз шулу. Дици хьпан бадали, «Табасаран район» МР-ин администрацияйин культурайин, спортдин, туризмдин ва жигьиларин политикайин отдели, жигьиларин парламентди, райондин образованиейин управлениейи бицIидаринна живанарин спортдин мектебарихъди сатIиди хайлин ляхин кIули гъубхну. Натижайиъ, спортдиан хъуркьувалар гъазанмиш апIувалтIан савайи, спортдиин машгъул шулайи жигьиларин кьадарра хайлин артухъ гъабхьну.
Гьар кварталиъ физкультурайин дарсар кивру мялимарихъди ва ДЮСШ-дин тренерарихъди семинарарра кIули гъягъюра. Думу семинарариъ, спортдин месэлйирси, жара месэлйирра гьял апIуру, тренировкйир гъахру, гьацира жара серенжемар гъягъру йишварихь хатIалу гьядисйир гъахьиган фу дапIну ккундуш, улупуру. 2020-пи йисан 1-пи апрелихъан мина, коронавирусдин тIягъвнихъди алакьалу вуди, райондиъ спортдин серенжемар кIули гъахувал кам дапIна.
– Райондиъ аьхю кьадар спортсменари иштирак’вал гъапIу фицдар серенжемар кIули гъухунчва?
– 30-пи августдиъ Табасаран райондиъ Ургур чвуччвунна сар чуччун гъалайиин «Табасаран – 2020» ччвур тувнайи спортдин аьхю турнир кIули гъубшну. Думу Ватандин Аьхю дявдиъ совет халкьди гъадабгъу Гъалибвалин 75 йис хьпаз ва Табасаран Урусатдик кибикьну 214-йис хьпаз бахш гъапIну. Думу турнир ццийин йисан Табасаран райондиъ гъубху варитIан аьхю серенжем гъабхьну. Дидиъ спортдин кчIихбарин жюрбежюр жюр-йириан варитIан ужударсдар, бажаранлу табасаран спорт-сменар, гьацира ММА жюрейин кчIихбариан Урусатдин, Европайин ва вари дюн’яйин чемпионарра иштирак гъахьну.
– Чухсагъул. Гъюру йис спортдиан гъадагъру гъалибвалариз хъана бегьерлуб ибшри.
